MYTM: “Be a Blessing, Not a Burden.”

Ang grupo sa Malaybalay Youth Transformation Movement kon MYTM nidawat sa usa ka pasidungog isip Most Promising Youth Social Enterprise sa tuig 2017 kaniadtong petsa 28 sa Hulyo tuig 2017 didto sa kaulohan.

Lakip sa nadawatan ang balig 100,000.00 pesos isip lakip sa premyo sa maong pasidungog. Ang programa gipasiugdahan sa Villar Foundation isip pag-aghat sa mga batan-on sa tibuok Pilipinas nga magtinabangay alang sa pagbatok sa kalisud ug paapangita ug pamaagi alang sa paguswag sa matag usa.

Ang mga nagsangka alang sa maong pasidungog mao ang mga hinas-hasan lamang nga mga Youth Organizations nga nagsumikad usa gikan sa Luzon, usa gikan sa Visayas ug usa gikan sa Mindanao nga mao ang MYTM.

Mahinumduman nga sa tuig 2009 hangtud 2010 nagkadaghan ang mga insedente kung asa nalambigit ang mga gangsters ug snatchers ning dakbayan sa Malaybalay.

Ang founder sa kalihukan sa MYTM nga si Pastor Richard Sibayan nakigtagbo ug nakighimamat sa mga grupo sa mga gangsters ug snatchers ning dakbayan dala ang mga pulong sa simbahan ug pag-aghat sa kabag-ohan alang sa tanan.

Inubanan sa suportasa Lokal nga pangagamhanan sa Malaybalay ug suporta nga gikan sa nagkalain-lain nga Religious Organizations naghinay-hinay ug kamugna ang maong grupo. Ang mga kalihukan naglangkub sa mga Community Outreaches, Sports Activities, Outings ug Exposures. Hangtud miabot ang panahon nga namugna sa grupo ang “Redemption Farm.”

Ang “Redemption Farm” hangtud karon ang nagsilbing ginakuhaan sa panginabuhian sa maong grupo alang usab sa pagsuporta sa ilang mga kalihukan nga lakip niini ang ilang “Street Kids Feeding Program” sa matag adlawng sabado sa matag semana, kini adunay kalambigitan sa ilang “Mission-Vision” nga naga ingon “From a Community Burden transforming into a Community Blessing.”

Comments are closed.