Dihadihang girespondihan sa lokal nga pangagamhanan sa Malaybalay pinaagi sa buhatan sa City Social Welfare and Development Office ang 11 ka pamilya nga nasunogan sa ilang tagsatagsa ka panimalay diha sa Sitio Malapgap, Sinanglanan, ning syudad.

Gikatahung lima ka balay ang naugdaw ug isa ka tindahan, samtang duha ka balay partially damaged nga nahitabo niadtong Agosto 9, 2022 kon diin ang opisina sa Mayor mismo ang mi-abag alang sa pagtubag diretso sa ilang nag-unang panginahanglanon.

Matud pa sa CSWDO, una nang nahatagan ang matag pamilya sa habol, banig, balde, kaldero, duha ka food packs, isa ka 5-gallon water container with faucet ug health kit.

Gisiguro ni Mayor Jay Warren R. Pabillaran nga iyang paningkamotan nga matabangan sila basi sa kapasidad nga pwedeng mahatag nga assistance gikan sa syudad.

Kasamtangan anaa sa Evacuation Center ang mga biktima nga giatiman sa CSWDO ug sa barangay nga mao usab ang moagak sa ilang mga panginahanglanon ug ang uban nagsaka sa ilang kaparentihan. Sigon sa taho, walay naangol o namatay sa maong panghitabo.

Gilauman usab ni Mayor Pabillaran nga makabangon na sa dali nga panahon ug makasugod pagusab sa ilang panginabuhian. Panawagan niya nga mag-amping ta kanunay ug sundon nato ang fire safety tips aron malikay kita sa katalagman.

Report: CMO-NADA