Ang Organic Agriculture Program sa Department of Agriculture (DA) nagtumong sa pagpasiugda, pagpalapad, pagpalambo ug pagpatuman sa praktis sa Organic Agriculture sa Pilipinas padulong sa usa ka malungtarong industriya nga makatampo sa pagpalambo sa panglawas, pagpanalipod sa kinaiyahan, pagkunhod sa peligro sa katalagman, ug mahimong lig-on likod sa pagbag-o-bag-o sa klima.
Ang mga seminar ug pagbansaybansay sa mga teknolohiya sa produksiyon usa sa mga proyekto, serbisyo, ug kalihokan sa Organic Agriculture Program. Busa, ang City Agriculture Office (CAgO) sa Malaybalay City isip lokal nga ahensiya nagsuporta sa misyon pinaagi sa paglungsad sa FFS on Organic Agriculture niadtong Mayo 25, 2022, diha sa Sto. Niño, Malaybalay City.
Ang demo area naglangkob sa 0.5 ka ektarya sa humay. Gibahin kini sa duha alang sa katuyoan nga matandi ang kalainan sa produksiyon. Ang 0.25 ka ektarya gitikad pito ka tuig na nga organiko, ug ang lain nga 0.25 ektarya ibalhinay pa sa organiko na pagpanguma.
Adunay 17 ka partisipante nga nigradwar sa training, pito ang lalaki samtang 10 ang babaye. Ang edad sa mga mag-uuma gikan sa 41-63 anyos.
Atol sa sesyon matag Huwebes, ang mga diskusyon, aktuwal nga demonstrasyon ug mga pagbisita sa area nahimo uban sa paggawi sa mga personahe sa CAgO. Ang mga leksyon nga gituki naglakip sa Modified “DAPOG” ug RA 11511; Mga Yugto sa Morpolohiya ug Pagtubo sa Humay; Pagpangandam sa Concoctions (Nature Farming Technology System); Organic Rice Production gikan sa Land Preparation, Crop Establishment, ug Transplanting; ug Presentasyon sa Agro-Ecosystems Analysis.
Ang mga facilitators nagpahigayon usab ug Benchmarking diha sa Regional Crop Protection Center, Bangcud, Malaybalay City.
Ang datos sa aktuwal nga abot sa duha ka lugar gitigom atol sa “Crop Cut Activity”. Ang unang grupo nga nagtanom sa organic area nakaani ug 41 ka sako nga naay 50 kilos matag sako, samtang ang ikaduhang grupo nga nagtanum sa conversion area nakaani ug 40 ka sako nga naay 49 kilos matag sako. Adunay kinatibuk-an nga 207% Return on Investment (ROI) alang sa duha ka mga area, usa ka maayo nga sangputanan gikan sa paggugol og oras sa pagkat-on sa FFS.
Ang graduation ceremony sa 17 ka mag-uuma niadtong Oktubre 19, 2022 gitambongan ni Atty. Mitchell D. Talatala, Executive Assistant sa Opisina sa City Mayor, Councilor Alan Ryann O. Legaspi, Councilor Winky A. Damasco, Councilor Dindo D. Dinlayan, City Agriculture and Fisheries Council (CAFC) Chairperson Leonard O. Leyros, ug Malaybalay City Organic Farmers Association (MACOFA) President Francis B. Malatamban.
Si EA Talatala nipadayag sa iyang mensahe nga nabati niya ang pagka pursegido sa mga partisipante tungod kay anak man pud siya sa usa ka mag-uuma. Iya usab nga gipadangat ang dakong suporta ni Mayor Jay Warren R. Pabillaran sa agrikultura. Naglaum siya nga magamit sa mga partisipante ilang nakat-unan ug molambo pa sila.
Samtang si Konsehal Legaspi nipasabot atol sa exit conference uban sa Bureau of Agriculture and Fisheries Standard (BAFS) niadtong Oktubre 13, nga nakapasa na sila og ordinansa alang sa ikaduhang pagbasa nga naglatid sa grants alang sa certification sa organic farming.
Si Konsehal Dinlayan midugang usab sa iyang pamahayag nga bisan sa lain-laing mga pangutana atol sa pag-umol sa mga ordinansa, andam siyang kanunay motabang. Samtang, gipaambit ni Konsehal Damasco ang iyang kasinatian sa organic farming ug gidasig ang mga mag-uuma sa pagpadayon sa ilang nasugdan.
Si CAFC Leyros sa iyang panapos nga mensahe miila sa kooperator nga si Mr. Wilmar B. Ompoc sa iyang sinseridad sa pagpraktis sa organiko. Gisugyot usab niya nga sa sunod nga mga partisipante sa FFS 18-40 anyos na ang edad. Dugang pa niya nga usa ka importanteng propesyon ang pagka mag-uuma tungod kay katulo sa usa ka adlaw sila naghatag ug pagkaon alang sa katawhan. Sa kataposan, iyang gidasig ang mga mag-uuma sa paggamit sa gitudlo kanila ug magpadayon sa pagkat-on tungod kay ang pagkat-on usa ka padayon nga proseso.
Ni: Gecel Q. Ocon, CAgO-NADA