Ang Fisherfolks Field School (FFS) sa Inland Fishery Production nagsugod niadtong Hunyo 14, 2023 ug ang petsa sa stocking nahitabo niadtong Agosto 8, 2023. Ang tumong sa FFS mao ang pagpakita sa resulta sa pagtandi sa overstocking ug standard stocking density sa tilapia.
Ang Inland Fishery Section sa buhatan sa City Agriculture maoy nagpahigayon sa pagbansay-bansay ug nagmugna sa 300 square meters alang sa overstocking ug 300 square meters alang sa standard stocking.
Ang pond alang sa overstocking gibutangan og 4,000 ka fingerlings (11 fingerlings/square meter) ug pond alang sa standard stocking gibutangan og 1,000 fingerlings (3 fingerlings/square meter).
Ang resulta sa FFS experimentation naghinapos nga adunay 3,909 ka piraso nga isda katumbas sa 233 ka kilo nga naani alang sa overstocked nga umahan, samtang 705 ka piraso sa isda nga katumbas sa 204 ka kilo nga ani alang sa standard pond.
Kini nagpakita nga ang overstock nga fishpond mahimong adunay daghang tilapia apan ang gidaghanon sa mga kilo duol ra kon itandi sa standard pond. Kini nagpasabot nga ang overstocked pond adunay mas gagmay nga gidak-on sa tilapia. Dugang pa, ang overstocked pond adunay net income nga Php 10,665.00 samtang ang standard pond adunay net income nga Php 9,045.00.
Ang graduation ceremony sa 25 ka partisipante niadtong Marso 14, 2024 gitambongan ni Barangay Captain Cyrus S. Torpio, Malaybalay City Fisherfolks Association (MCFA) President Ronnie T. Singatao, City Agriculture Office OIC Engr. Richard B. Leono, Supervising Agriculturist Vic Ian T. Alcontin, Inland Fisheries Section Head Ms. Ma. Jorgen P. Soriano, ug Kulaman Agriculture Extension Officer Ronilo C. Inocencio.
Si Engr. Richard B. Leono nagpadayag sa iyang kalipay nga anaa na pud 25 ka partisipante nigradwar sa maong FFS. Siya usab mipaambit nga dako og tabang ang produksiyon sa isda sa pagpauswag sa kaayohan sa mga mangingisda.
Dugang pa, iyang gidasig ang mga partisipante sa paggamit sa ilang nakat-onan ug nanghinaot nga magmalampuson ang ilang panginabuhi. Dayon iyang gipaambit ang mahitungod sa plano sa City Government of Malaybalay nga mopalit og usa ka backhoe unit alang sa MCFA ubos sa supplemental budget aron matabangan ang mga mangingisda nga gustong moapil o mopalapad sa ilang mga fishpond.
Si Ms. Eva Balahay, ang kooperator nipadayag nga ang maong proyekto dako nga tabang alang kanila aron mapalambo ang ilang pinansyal nga kita sa pagpangisda. Gitubag dayon ni Mr. Ronilo C. Inocencio, ang AEO sa Kulaman nga ang pagpangisda usa ka dakong negosyo ilabina ang produksiyon sa Tilapia.
Ang City Government of Malaybalay, pinangulohan ni Atty. Jay Warren R. Pabillaran, naghatag ug mga inisyatiba sa pagpataas ug pagpalapad sa pangisda sa dakbayan, sa ingon makadugang kalamboan sa agrikultura.
Ni: Gecel Quinquiño-Ocon, Agri-NADA