Ang lokal nga pangagamhanan sa Malaybalay pinaagi sa Human Resource Management Office ang nahimong sponsor sa binulan nga convocation program kon diin ang Septyembre mao usab ang kasaulogan sa Philippine Civil Service Month. Kini nahigayon niadtong Septyembre 12, 2022 didto sa People’s Hall, New City Hall nga may tema “Transforming Public Service in the Next Decade, Honing Agile and Future Ready Servant Heroes”.

Si Attorney Noemi Rabe Torres, Assistant Regional Director sa Civil Service Commission Region X, ang nahimong dinapit nga mamumulong kon diin iyang gipasabot ang kamahinungdanon sa pagpadulong sa digital nga kabag-ohan tungod sa teknolohiya sa impormasyon ug komunikasyon diin nahimong mas madali o mas episyente.

Gipasabot usab niya ang daghang mga bentaha sa paggamit sa automation nga mas epektibo, tukma ug untop sa panahon sa mga panginahanglanon ug hangyo sa mga kliyente sa gobyerno.

Sa mensahe ni City Mayor Jay Warren R. Pabillaran, iyang gihatagan ug gibug-aton nga “isip usa ka kawani sa gobyerno kinahanglan kanunay nimong hinumdomon ang pagbuhat sa husto ug masunod na usab kini ngadto sa uban pa nimo nga mga buluhaton, kalakip na niini ang pagdawat sa mga pagsaway ug dili lamang hunahunaon ang mga negatibo sa palibot”.

Mitambong usab sa maong programa sila si Vice Mayor Estelito R. Marabe, City Councilors Brian Nelson Flores, Dindo Dinlayan, Melchor Maramara, Cromwell Kiril Dinlayan, Roy Orquia, Alan Ryann Legaspi, Winky Damasco, Niko Aldeguer ug IP representative Rene “Datu Makayuba” Sumbongan.