Mas maayong kita sa umahan ug malungtarong pagpang-uma – mao kini ang gilauman sa sektor sa agrikultura.

Tungod niinini, gipahihayon sa City Agriculture Office ubos sa pagdumala ni Remedios R. Sarzuelo ang isa ka farmers field school kun FFS didto sa Sitio Kilap-agan, Brgy. Canayan. Dili lamang tubag sa kasiguraduhan sa pagkaon ug pagtubag sa inadlaw-adlaw nga panginahanglanon, ang maong kalihukan naga-enganyo usab sa mga partisipante palayo sa kalihuka’ng makatugaw sa peace and security sa ilahang barangay.

Aduna’y 30 ka mag-uuma sa maong dapit ang nakagradwar sa maong pagtuon diin ang mga partisipante sa FFS giorganisa sa Philippine Army. Nakaagi sila ug lain-laing session ug field activities sulod sa usa ka tuig sugod Hulyo 23, 2021 hangtod Agosto 17, 2022.

Nanguna sa ilang nakat-unan ang mga teknik sa pag-uma’g high valued commercial crops, ug apil ang crop diversification technology. Ang maong teknik nagpasiugda sa paglain-lain sa tanum pinaagi sa crop rotation, daghang pagtanom, og intercropping. Ang katuyuan nianing mga pamaagi ang pagpa-uswag ug pagpalungtad sa produkto ug suplay sa mga sistema sa ekolohiya.

Kini nga pagbansay-bansay gipasiugdahan sa 9 ka personahe sa CAgO ubos sa High Value Commercial Crops Team nga gipangulohan ni Mr. Emegen L. Disalan. Ang mga partisipante nakaugmad sa 3,056 sq.m. ug gitamnan ug saging, kalabasa, luy-a, okra, sweet corn, ug mga punoan sa prutas.

Atong mabalikan nga niadtong 2020, gipatuman sa City Agriculturist’s Office ang “HVCC Farmers Field School with emphasis on Crop Diversification” sa Barangay Patpat. Taliwala sa Covid-19 Pandemic, malampuson nga napahigayon ang programa tungod kay nasaksihan sa mga mag-uuma ang kabililhon sa diversified farming kompara sa monocropping. Tungod niini, sa miaging tuig nagplano ang maong buhatan nga i-replika ang teknolohiya ngadto sa Sitio Kilap-agan sa Can-ayan aron mapadayon ang kalinaw ug kahapsay sa lokasyon.

Human sa taas nga panahon sa pagbansay-bansay, nigradwar ang 19 ka babaye’ng mag-uuma, ingon man sa ilang kauban nga 11 usab ka lalake, niadtong Agosto 17, 2022 sa Sitio Kilap-agan, Can-ayan. Mitambong sa maong FFS graduation ang maabtiko’ng mga miyembro sa Sangguniang Panlungsod nga sila si City Councilors Alan Ryann O. Legaspi, Brian Nelson T. Flores, ug Royland M. Orquia, ug usab siCAFC chairperson si Leonard O. Leyros. Giabi-abi ni Mr. Perfecto G. Guaynon, lider sa sitio ug usa ka farmer cooperator, ang mga halangdon nga mga bisita ug mipadayag sa iyang kinasingkasing nga pasalamat sa pagpili kanila nga makadawat niini nga programa.

Si Sarzuelo mipahayag sa iyang mensahe sa esensya sa crop diversification nga makatabang sa mga mag-uuma nga makamugna og kita. Iyang gipasiugda ang teknolohiya pinaagi sa pagpasabot nga dili magdepende lang sa usa ka tanom aron dili lang makaduha ang anihon sa mga mag-uuma apan mas daghan pa sa usa ka tuig. Naglaum siya nga magamit sa mga partisipante ang ilang nakat-unan ug gipasalig nga ang CAgO magpadayon sa pagsuporta aron mapadayon ang programa pinaagi sa mga serbisyo niini.

Sa laing bahin, ang SP chair on agriculture nga si Councilor Legaspi nagdugang ug makadaisg sa mga minggradwar nga ipadayon ang ilang nakat-onan. Misugil usab siya nga padayon niyang suportahan ang sektor nga iyang gihuptan, partikular na ang agrikultura ug kinaiyahan.

Si Konsehal Orquia isip gakupot sa Komitiba sa Peace and Order sa dakbayan, nipadayag sa iyang kalipay tungod sa panaghiusa sa Sitio Kilap-agan. Gipaambit niya ang iyang mga hunahuna pinaagi sa usa ka kinutlo nga nag-ingon “Hatagi og usa ka isda ang usa ka tawo ug mabuhi siya sa usa ka adlaw, apan kung tudloan nimo ang usa ka tawo kung unsaon pagpangisda, mabuhi siya sa tibuok niyang kinabuhi.” Iyang gipasabot nga iyang gi-apresyar kining maong programa sa CAgO ug kini kinahanglan nga suportahan. Ang pagtudlo sa mga indibidwal sa komunidad sa pagsuporta sa ilang kaayohan gikinahanglan. Dugang pa niya nga ang mga tawo makasulti sa pag-uswag ug kalamboan kung aduna kitay kalinaw ug kahusay. Unya gitapos niya ang iyang mensahe pinaagi sa pahinumdom nga nag-ingon nga “Lihok tawo kay ikaw tabangan”.

Gipaambit usab ni Konsehal Flores ang iyang mga kasinatian sa pagpanguma diin usa sa mga nipanaw na nga personahe sa CAgO ang mitabang kaniya. Gihatagan niya og gibug-aton ang kamahinungdanon sa natun-an sa mga mag-uuma, nga dili lamang sa pagpananom apan lakip na sa pagpamaligya sa ilang mga produkto. Mapasalamaton siya nga mipadayag nga malampuson kining maong programa nga gisugdan ubos sa administrasyon sa iyang amahan nga si Mayor Florencio T. Flores Jr. ug gipadayon sa administrasyon ubos ni Mayor Jay Warren R. Pabillaran.

Giila ni CAFC Chairperson Leyros ang tibuok puwersa sa City Agriculture Office nga mitabang niini nga programa. Isip CAFC Chairperson, iyang giila ang mga paningkamot sa mga Rural Based Organizations (RBOs) nga iyang gidumala. Iyang giawhag ang mga mag-uuma sa pag-andam og letter of intents alang sa ilang hangyo nga i-address ngadto sa City Agriculturist. Dayon iyang gipaambit ang kamahinungdanon sa mga mag-uuma nga nagpakaon sa mga tawo tulo ka beses sa usa ka adlaw.

Ni: Gecel Q. Ocon, CAgO-NADA