Ang lokal nga pangagamhanan sa Malaybalay pinaagi sa City Disaster Risk Reduction and Management Office (CDRRMO) pinangulohan ni Alan J. Comiso, department head ug sa pakigtimbayayong sa Office of Civil Defense 10, mihatag ug teknikal nga tabang sa pagpahigayon sa upat ka adlaw nga training workshop alang sa Contingency Planning on Emerging and Re-Emerging on Infectious Disesases (EREID) niadtong Agosto 1-4, 2023 didto sa People’s Hall, Malaybalay City Hall.

Ang nasangpit nga planning workshop gitambongan sa mga miembro sa Technical Working Group (TWG) nga gikan sa lain-laing buhatan sa lokal nga pangagamhanan sa Malaybalay ug mga personahe sa CDRRMO.

Tumong sa maong kalihukan ang pagtuon sa mga teknikal nga mga pamaagi sa paghimo sa usa ka contingency plan ilabi na sa EREID. Kini aron ma-andam ang usa ka organisasyon sa paghimo sa epektibong paagi ug mga lakang pagtubag sa emerhensya sa panahon nga adunay makatakod o infectious nga sakit ang mokaylap sa dakbayan.

Mipadangat si Chief Comiso sa iyang pasalamat ngadto sa mga tagdumala ug mga partispante sa kalampusan sa maong kalihukan.

Report: CDRRMO – NADA