Aron mapalambo ang kahibalo sa teknolohiya ug mapadali ang opisyal nga mga proseso, 42 ka empleyado sa City Government of Malaybalay ang nakaapil sa duha ka adlaw nga basic computer literacy training niadtong Oktubre 15-16, 2024 sa People’s Hall, City Hall.

Ang kalihokan gidumala sa City Human Resource and Management Office (CHRMO) ubos sa liderato ni Magnolia O. Improgo.

Gitun-an sa mga partisipante ang nagkadaiyang software applications sama sa Microsoft Word alang sa pagproseso og dokumento, PowerPoint alang sa mga presentasyon, ug Excel alang sa pagplano ug pag-analisa sa datos.

Lakip usab sa gitudlo ang Google Workspace, ug mga AI tools sama sa Canva ug ChatGPT, nga gipunting aron mas episyente ang ilang pagtrabaho sa opisina.

“Gikinahanglan nga ang atong mga kawani mas mabansay sa modernong teknolohiya aron mapadali ug mapaayo ang serbisyo alang sa katawhan sa Malaybalay,” matud ni Improgo.

Gipasalamatan usab niya ang mga in-house trainers gikan sa City Administrator’s Office-MIS ug City Planning and Development Office alang sa ilang kontribusyon sa kalampusan sa training.

Gilauman nga pinaagi sa maong pagbansay, mas mapaayo pa ang mga serbisyo ug produktibidad sa mga kawani sa City Government sa umaabot.

With report: CHRMO-Nada