Giaprobahan na sa Sangguniang Panlungsod ang Ordinance No. 1046 S 2024, nga nag-institutionalize sa paghatag ug subsidiya sa kwalipikadong medical students dinhi sa siyudad sa Malaybalay.

Giduso ni Konsehal Dindo D. Dinlayan, Chairman sa Committee on Education, ang pag-aproba sa ordinansa. Kini nga programa nagatuo nga maghatag ug kalidad nga edukasyon ngadto sa mga potensyal ug academically deserving nga estudyante aron makapadayon sila sa ilang pagtuon ug magmalampuson sa health profession.

Sa milabay nga napulo (10) ka tuig, naobserbahan nga ang gidaghanon sa mga doktor sa Malaybalay ubos sa ideal nga ratio nga 1:20,000 doctor-populasyon. Kini usa sa mga rason nga namugna ang balaud aron madugangan ang mga doktor nga magserbisyo sa lagyong lugar nga gitawag ug “Barrio Doctor.”

Naitala sa ordinansa ang mga termino ug kondisyon, lakip na ang mga kinahanglanon sa pag-apply sa academic subsidy. Human sa masusing pagtuon, atol sa ika-101 nga regular session niadtong Hulyo 23, 2024, hiniusang giuyunan sa konseho ang pag-aproba sa ordinansa, ug gi-aprobahan usab kini ni Mayor Jay Warren R. Pabillaran niadtong Hulyo 30, 2024.

Tungod niini, mahatagan ug higayon ang mga kwalipikadong estudyante nga makapadayon sa pagtuon sa medisina ug madugangan ang mga doktor nga makaserbisyo sa siyudad sa Malaybalay.

Report: SP-NADA