Ang lokal nga panggamhanan sa Malaybalay, pinaagi sa City Environment and Natural Resources Office (CityENRO) ang miapil sa provincial evaluation sa Gawad Pangulo sa Kapaligiran (GPK) assessment and feedback niadtong Nobyembre 16, 2022, sa Peoples Hall, New City Hall, Casisang, ning syudad.

Ang GPK usa ka institutionalized awards and incentives scheme ubos sa probinsyal nga pangagamhanan sa Bukidnon para sa mga LGUs nga nagpakita sa exemplary performance sa environmental governance and protection. Ang proseso sa evaluation gibahin sa katulo mao ang: barangay evaluation, city evaluation (field validation and document review), ug feedback.

Ang GPK evaluation team gilangkuban sa lain-laing mga buhatan gikan sa kagamhanang probinsyal nga adunay representasyon usab sa civil society organizations (CSOs).

Ang maong kalihukan gitambungan nila ni Mayor Jay Warren R. Pabillaran, City Councilor Alan Ryann O. Legaspi, CLGOO Amalia Propia, mga opisyal sa Barangay Casisang ug Barangay Uno, mga empleyado sa syudad, provincial evaluators, ug pipila gikan sa nasudnong ahensya.

Ang pipila ka obserbasyon ug rekomindasyon gikan sa mga evaluators ilang gipresentar atol sa feedback activity aron mapauswag pa sa mga barangay ug siyudad ang ilang mga aksyon ug mapadayon ang labing maayong gawi sa dakbayan sa natad sa pagdumala sa solid waste ug mga kaakohan alang sa pagpanalipod sa kinaiyahan.

Sa iyang tubag, gisubli ni Mayor Jay Warren R. Pabillaran ang kamahinungdanon sa ebalwasyon ug feedback gikan sa evaluators. “Importante kaayo ni aron ma assess nato aha pa ang kinahanglan pa nga ma-improve.” Dugang pa, iyang gipahinumdoman ug nanghinaot nga ma disipilina ug ma challenge ang katawhan nga mas maila nga limpyo nga syudad isip usa sa mga lungsod nga gahulagway sa kanindot sa probinsya sa Bukidnon.

Sa samang kalihokan, ang Brgy. Kalasungay, Brgy. Uno, ug ang dakbayan sa Malaybalay nakadawat ug maayong feedback ug grado gikan sa mga evaluators gamit ang enhanced GPK tool nga adunay mga indicators nga naglambigit sa environmental management, space greening, well-maintained facilities, solid waste management, ug support system.

Ang siyudad sa Malaybalay padayong nagpasiugda sa pagdumala nga ma-prioritize development concerns sa natad sa environmental governance, makab-ot ang clean and green nga komunidad ug matubag ang hagit sa climate change adaptation programs.