Giaprobahan na sa Sangguniang Panlungsod ang SP resolution No. 2022-0012, mao ang Memorandum of Understanding tali sa City Government of Malaybalay and the Department of Social Welfare and Development-Field Office 10 alang sa pag-implementar sa supplemental feeding program sa tanan day care centers, diri sa syudad.

Ang maong resolusyon giduso ni Councilor Brian Nelson Flores ug gi-uyonan usab sa konseho niadtong Hulyo 26, 2022 atol sa ilang ika-upat nga regular session. Tungod niini, gihatagan sa pagtugot si Mayor Jay Warren R. Pabillaran nga mapatuman ang maong programa gikan sa kaulohan alang sa kampanya sa pagbatok sa malnutrisyon.

Gisiguro sa maong palisiya nga makabaton ang kabataan sa saktong nutrisyon ug sustansyadong pagkaon diha sa tagsatagsa ka pamilya ug komunidad. Naglantaw usab kini nga mapalig-on ang “National Feeding Program” hilabi na sa undernourished nga gatungha sa atong day care centers, kindergarten, ug elementarya.

Ubos sa Republic Act 11037 kon “Masustansyang Pagkain para sa Batang Pilipino Act of 2018,” gimando sa maong balaud nga makigtimbayayong ang nasangpit nga mga ahensya aron sa pagmugna sa usa ka comprehensive national feeding program.

Sumala pa sa City Social Welfare and Development Office, gibana-bana nga adunay 4,000 ka nga bata ang makabenepisyo karong tuig 2022.

Report: SP-NADA