Gisugdan na sa pagpanghatud ang mga election ballots ug paraphernalia kauban ang Board of Election inspectors (BEIs) nga kini pagaubanan ug pagabantayan sa atong kapulisan diha sa nagkadaiyang polling precincts sulod sa 46 barangays ning syudad sa Malaybalay.

Giklaro sa buhatan sa City Treasurer nga gipangulohan ni Rosie T. Dumas nga mahatud na ang tanan ballot boxes ug vote counting machines kon VCMs sa Mayo 5-6, 2022. Subli gipahibalo sa City Treasurer nga dili pa apil ang “official ballots” sa ihatud sanglit didto na kini sa Mayo 8-9 kauban ang BEIs nga magdala sa matag presinto.

Dugang pa ni Dumas, gisiguro sa buhatan kauban ang City Administrator’s Office ubos ni Atty. Anna Marie R. Bergado nga makumpleto na ang pagpanghatud sa mga gamit sa petsa nga gitagana sa COMELEC.

Sigon sa mando sa COMELEC pinaagi kang Acting City Election Officer, Atty. Danilo N. Dividina nga ipahigayon ang “Final Testing and Sealing” sa tanang voting machines sa Mayo 6, 2022, alas 9:00 sa buntag.

Sumala pa sa atong election officer, kining orasa magtigum ang Election Boards (EBs) dungan ang pagsulay ug pagselyo o sirado sa VCM diha sa tagsatagsa nga presinto kon asa nga voting center diha sa matag barangay.