Ang lokal nga pangagamhanan sa Malaybalay pinaagi sa City Clean and Green Committee mibisita sa mga kabarangayan alang sa pagpahigayon sa tinuig nga search for the cleanest and greenest barangay.

Gibahin sa duha ka grupo ang City evaluating team aron malantaw ang mga nahimo nga mga kalihokan, programa, proyekto sa clean and green diha sa 46 ka barangay sugod niadtong Pebrero 1 hangtud 21, 2023.

Nasayran nga gibalidar sa tagsatagsa ka area kung kini napatuman ba sa barangay ang kanatibuk-ang kalimpyo sa palibot nga gisakupan.

Lakip sa gisuta mao ang greening programs sama sa pag alima sa tree park, gulayan sa barangay, pagpanindot sa pampublikong lugar, pagpatukod og kaugalingon nga nursery ug tree planting activities.

Gitan-aw usab ang pagpapatuman sa mga plano ug kalihokan sa solid waste management sama sa sakto ka pagsegregate sa basura, pagmugna og material recovery facility, recycling activities, ug ingon man ang pag-adopt sa City Ordinance 962.

Dugang sa gilantaw ang pamatasan sa health and sanitation ug giseguro ba nga makontrolar ang paglatagaw sa la-aw nga kahayopan diha sa kadalanan.

Dako ang pasalamat sa mga opisyales ug lumilihok sa barangay ngadto sa city government aron sa pagmonitor ug pag-ebalwar sa performance sa miaging tuig nga mahatagan og saktong giya ug rekomendasyon sa mga lakang sa sunod nga higayon.

Gilauman usab sa evaluating team nga magpadayon nga lig-on ug makanunayon ang suporta sa kabarangayan sa pag-implementar sa clean and green program. Gidasig usab sa evaluators nga ma-sustain kini sa matag bisita kanila kada quarter sa tuig.

Kahinumdoman nga kini nga programa nasugdan sobra na sa 20 ka tuig ubos sa “Gawad Pangulo sa Kapaligiran” niadtong 2001, pinasikad base sa Republic Act 9003.