Sukad sa pagsugod niadtong Enero 2, 2024 hangtud Pebrero 1, 2024, ang pagpahigayon sa Business One Stop Shop (BOSS) sa nagkalain-laing dapit sa dakbayan sa Malaybalay, lakip na niini sa New City Hall, sa barangay Casisang alang sa Poblacion cluster, barangay Linabo alang sa basakan cluster ug barangay Zamboanguita alang usab sa Upper Pulangi cluster, mipakita kini ug pagsaka sa kita, ug numero sa mga negosyante nga mipahigayon sa pag-renew sa ilang mga business permits ingon man mga aspiring business owners nga buot usab mosugod sa negosyo.

Mikabat sa 4,429 ka mga negosyo ang na renew nga mga permits samtang 633 ang mga bag-ong aplikante nga mi-file atol sa pagpahigayon sa BOSS, ug kini nakapadasig sa pagsugod sa bag-ong tuig alang sa lokal nga ekonomiya.

Miabot sa P 53,328,442.30 ang kita nga nakolekta sa business taxes alang sa tuig 2024 ug kini adunay pagsaka ikompara sa miaging tuig nga adunay P 46,964,806.33. Ang permit fee sa tuig 2024 miabot sa P 5,330,924.40 samtang sa tuig 2023 kini mi-total sa
P 5,065,294.00. Samtang ang other regulatory fees mga misuma-total sa P 11,086,273.03 sa 2024, adunay pagkunhod ikumpara sa tuig 2023 nga adunay P 11,515,576.04 nga nakolekta.

Bisan pa sa pag retiro sa 25 ka mga business permits sa 2024 tandi sa 199 sa 2023, ang kinatibuk-an nga pagtubo sa negosyo nagpakita sa kalig-on ug kadasig sa lokal nga entrepreneurial ecosystem ingon man maayong business environment bisan pa man nga adunay gamay lamang nga pagserado ug pag suspende sa ubang negosyo.

Ang pagtandi sa mga numero sa tuig 2023 mipakita ug positibong trend sa pakiglambigit sa negosyo ug revenue generation, bisan pa man nga adunay pagkunhod sa mga bag-ong aplikante sa negosyo sa tuig 2024 nga aduna lamang 633 tandi sa 697 sa miaging tuig, apan ang pagpabilin nga steady sa renewal sa mga business permits timaan sa padayon nga pagsalig sa local market.

Sa kinatibuk-an, ang BOSS 2024 wala lamang nagpahigayon sa hapsay nga pagproseso alang niadtong aduna nay negosyo apan nahimo usab kining plataporma nga makapadasig sa mga bag-ong mosulod sa negosyo, ingon man makapalambo ug makapatubo usab sa ekonomiya ug kalamboan sa rehiyon.

Report: BPLD – NADA