Ang Barangay Council sa Barangay Patpat naghangyo sa lokal nga pangagamhanan sa Malaybalay aron makapahigayon og usa ka “Mass Wedding” sa ilang Barangay, human kini nila nasayran nga daghan sa lumulupyo ang kasamtangan nag-ipon, ug aduna nay mga anak apan wala pa makasal.

Dugang pa sa konseho, dugay na usab nga walay naipahigayon nga Mass Wedding sukad nahitabo ang pandemya.

Isip tubag sa maong hangyo, natuman ang gipangandoy sa mga magtiayon nga makasal ubos sa programa sa syudad nga libreng Mass Wedding ceremony diha sa Barangay Patpat, Malaybalay City, kaniadtong Marso 25, 2024.

Nanumpa ang 19 ka mga paresan ug nagbinayloay sa ilang matam-is nga “Oo” atubangan kang Mayor Jay Warren R. Pabillaran, isip solemnizing officer.

Ang kalihokan nagmalampuson tungod sa dakong suporta sa Konseho sa Barangay Patpat inabagan sa City Civil Registrar Office nga maoy nangandam dili lang sa mga papeles apan apil na usab ang mga dekorasyon aron presentable, memorable ug maanindot ang lugar sa seremonya.

Gihatagan usab ni Mayor Pabillaran og importansya ang Civil Registry Documents sa kasal nga kini maka-benebisyo sa lain-laing programa sa gobyerno hilabi na sa Philhealth Indigency Program.

Gikalipay sa mga bag-ong kasal nga napahigayon ang maong kalihokan nga gipangulohan gayud sa amahan sa syudad.

Report ni: Madona M. Ipanag, CCRO-NADA Coordinator