Nagpasiugda ang Malaybalay City Health Office (CHO) team nga pinanguluhan ni Dr. Dennis P. Sangalang (CHO II), kauban si Dr. Melirose S. Deticio ( Basakan District Dr. In-charge) ug Dr. Kim Luardo og usa ka medical mission para matagaan ang mga katawhan og kahibalo sa peligro nga sakit nga posible makuha panahon sa baha.

Naghatag usab og tambal uban sa konsultasyon niadtong Enero 19, 2023 diha sa covered court, Brgy Sinanglanan ning dakbayan.

Nasayran nga nakasinati ang tibuok probinsya sa Bukidnon og mga pag-ulan sa mga nanglabay nga mga adlaw. Lakip na niini ang kinatibuk-an sa syudad sa Malaybalay mao dili malikayan ang mga pagbaha. Uban sa baha naay peligroso nga magka-leptospirosis.

Ang leptospirosis usa ka kondisyon nga makaapekto sa tao ug sa mga kahayupan labi na kung ang isa ka tao makainom og kontaminado nga tubig ug kaha musuong sa tubig baha unya naa siyay samad sa iyang mga tiil o sa uban pa nga parte sa lawas diin makasulod ang kagaw.

Ang CHO team nagpakita sa ilang suporta ug nagpaambit sa ilang mga kahibalo bahin sa epekto sa Leptospirosis atubangan sa mga residente sa maong barangay kauban ang presensya ni Punong Barangay Nilo Aldeguer.

Uban usab ang CHO nurses ug mga kawani, ilang gipasabot nga mag-amping kanunay kung musuong sa bahaon nga lugar. Ang maong kondisyon pwede matambalan pinaagi sa pag inom ug antibiotic.

Ang CHO pharmacy uban ni maam Arlene Neri nga nag apud-apud og mga tambal para malikayan ang Leptospirosis.

Nagpadayag sa iyang pasalamat si Brgy. Kapitan Aldeguer. Nagpaambit usab sa ilang kahibalo ug serbisyo ang mga nurses, midwives ug staffs sa CHO nga sila si Mercy L. Marcelino, Shelleme O. Macatol, Greffi B. Chua, Fiona M. Dapigran, Jenny Jumamoy, Allain M. Bautista, Edna Fe M. Pendatun, Apple Doydoy ug Jezza Niña Marie T. Vega.

By: CHO-NADA