Gipahigayon sa City Engineering Office (CEO) ang usa ka public hearing niadtong Hulyo 30, 2024, sa Barangay Sto. Niño covered court aron hisgutan ug ipasabot ang implementasyon sa Executive Order (EO) No. 51, series of 2024.

Ang maong EO, nga gipirmahan ni Mayor Jay Warren R. Pabillaran, nagmando sa temporaryong pagsirado sa Macote steel bridge alang sa mga sakyanan nga adunay timbang nga 5-tonelada o labaw pa.

Ang tulay, nga nagkonektar sa Barangay Simaya ug Sto. Niño, nagpakita na og mga timailhan sa estruktural nga problema, nga angayan tagaan og hustong pagtagad aron malikayan ang dugang kadaot ug masiguro ang kaluwasan sa publiko.

Si Engr. Leo Rustan L. Dela Cerna, uban ang mga kawani sa CEO, nanguna sa diskusyon ug nagpasabot sa kamahinungdanon sa maong restriksyon. Gipasabot nila nga ang temporaryong pagsirado mao ang labing angayan nga lakang aron maprotektahan ang mga motorista ug mga residente sa lugar.

Samtang ang Traffic Management Center (TMC) mitanyag og rerouting plan aron ma-manage ang trapiko sa mga apektadong sakyanan. Gibutang usab nila ang mga warning signages ug barikada aron mahatagan og giya ang mga motorista bahin sa bagong patakaran.

Ang kalihokan gitambongan sa mga opisyales gikan sa Barangay Sto. Niño, Apo Macote, ug Nabag-o sa Valencia City. Dugang pa, gibuksan usab kini nga diskusyon sa mga tag-iya og quarry, contractor, ug drayber sa trak aron mas masabtan ang maong direktiba.

Ang implementasyon sa EO nagsugod niadtong Agosto 2, 2024, ug magpadayon hangtod sa sunod nga pahibalo.

Report: CEO-NADA