Isip pagsaulog sa Indigenous Peoples (IP) month sa Oktubre, gi-uyonan sa mga opisyal sa 9th Sangguniang Panlungsod (SP), nga gipangulohan ni Vice Mayor Estelito R. Marabe, ang pagpahigayon sa ika-113 nga regular session sa City IP Tulugan.

Ang maong kalihokan resulta sa pagsumite sa sugyot ni City Indigenous Peoples Mandatory Representative (IPMR), Councilor Renato “Datu Makayuba” Sumbongan, sa miaging bulan.
Kini aron itaas ang pag-ila ug pagrespeto sa kulturang lumad atol sa kasaulogan sa IP month.
Matud ni Councilor Sumbongan, gikalipay niya nga nahitabo ang sesyon sa IP-Tulugan, nga nahimutang likod sa City Hall Main Building, niadtong Oktubre 15, 2024.

Gitataw niya nga kini usa ka simbolo sa ilang padayong paningkamot sa pagpakita ug pagpalig-on sa kulturang lumad.

Gi-awhag usab sa City IPMR ang publiko nga mosaksi sa umaabot nga cultural presentation sa Kaamulan Folk Arts Theater karong Oktubre 22, 2024, nga ipahigayon isip usa ka pasundayag sa kultura ug tradisyon sa mga lumad, ning dakbayan.

Samtang, gidayeg ni VM Marabe ang mga paningkamot sa mga IP ubos sa liderato ni Datu Makayuba, ug gipahayag ang iyang suporta sa mga kalihokan nga nagpalig-on sa mga katungod sa mga lumad, subay sa Indigenous Peoples Rights Act (IPRA).

Giila usab niya ang dedikasyon ni Councilor Sumbongan alang sa pagserbisyo sa IP ug komunidad, nga walay katupong ang kabililhon.

Ang IP Tulugan usa ka tradisyonal nga estruktura sa mga Indigenous Peoples diin gipahigayon ang mga tigom, ritwal, ug seremonyas.

Kini usa ka sagradong dapit nga nagrepresenta sa kultura, tradisyon, ug panaghiusa sa mga lumad. Sa kasamtangan, gigamit kini alang sa opisyal nga mga kalihokan sa IP nga nagpakita og respeto sa ilang kultura.

Report: SP-Nada