Gipasiugdahan sa buhatan sa City Veterinary ang ikaduhang lunes nga convocation program sa lokal nga pangagamhanan sa Malaybalay. Kini nag-angkla sa tema: “Basic Guidelines to Determine Safe Meat in the Market,” karong adlawa, Marso 13, 2023, didto sa People’s Hall, City Hall, ning dakbayan.

Ang nasangpit nga kalihokan gitambongan ni Mayor Jay Warren R. Pabillaran, Bise Mayor Estelito Marabe, SP Councilors, heads ug representante sa lain-laing departamento ug opisina, mga kawani ug mga personahi sa men-in-uniform.

Si Dr. Jess Anthony A. Recososa, National Meat Inspection Service (NMIS) Senior Meat Control Officer ug Area Veterinarian sa Bukidnon, mao ang dinapit nga mamumulong. Siya mipaambit sa iyang kahibalo ug kahanas sa meat safety awareness isip kabahin sa tema karong buwana

Gipaabot ni Dr. Recososa nga importante nga kabalo kita sa basic guidelines sa pag-ila sa luwas ug limpyo nga karne diha sa merkado. Dugang pa niya, pinaagi sa sertipikado nga baligyang karne sa merkado makasiguro kita nga luwas ta ug ang atong pamilya ug malikayan ang sakit nga posible makuha sa wala moagi sa accredited slaughterhouse.

Sa iyang bahin, si Mayor Pabillaran mipadayag sa iyang dakong pasalamat sa buhatan sa city veterinary. “Ako mapasalamaton sa opisina sa city vet sa pagsiguro sa natad sa food safety alang sa katawhan sa Malaybalay”.

Dugang pa niya nga nakakuha na ang siyudad og lugar diin sa dili madugay ibalhin ang slaughterhouse. “Naa na kita’y napalit nga yuta para ma balhinan sa atong slaughterhouse, ug puhon inig anaa na, we aim for a double A accreditation nga certified gikan sa NMIS.”

Samtang sa programa, gitunol usab ang mga pasidungog ngadto sa Malaybalay City Local Civil Registry Office alang sa makanunayon nga pagmintinar sa ilang buhatan sa civil registration ug sa pagkab-ot sa second place sa 2022 Outstanding City Local Civil Registry Office—Extra Large Category sa Philippine Statistics Authority sa Bukidnon. Si PLTCOL Ritchie Anoy Salva, Malaybalay Chief of Police, midawat usab og pag ila sa iyang talagsaong performance ug tiunay nga serbisyo para sa dakbayan sa Malaybalay gikan sa buwan sa Hunyo 2021 hangtod Marso 2023.