Ang lokal nga pangagamhanan sa Malaybalay pinaagi sa City Veterinary Office – Livestock Production section padayong naghatud sa mga serbisyo alang sa mga kahayupan sa tibuok barangay sa dakbayan.

Niadtong Agosto 8, 2023, gipahigayon ang pagpangapod-apod sa mga bitamina ug technical assistance ngadto sa usa ka local goat farm, pagpanambal sa adunay mga balatian nga mga hayop ingon man pagpahigayon sa artificial insemination ngadto sa mga baboy, kabaw, kanding ug baka. Kini nga mga serbisyo gihimo sa mga kawani sa maong buhatan pinaagi sa pagpanguna ni Dr. Omar T. Cahanap.

Samtang gihatud usab sa mga kawani sa livestock production unit niadtong Agosto 9, 2023, ang veterinary technical services ngadto sa usa ka dairy project sa barangay Kulaman, kon diin sila gitudloan kabahin sa pag gamit, proper handling ingon man kung unsaon pag withdraw sa usa ka matang sa veterinary drug sa dili pa kini gamiton sa pagtambal. Ang maong mga pagtulun-an gipa-ambit ni Dr. Cahanap ngadto sa upper pulangi cluster barangay veterinary extension officers.