Sa padayon nga pagsaka sa mga produktong petrolyo sa nasud, ang Departamento sa Agrikultura Rehiyon 10 (DA-10) sa Northern Mindanao nagpadayon sa pagpang-apod-apod sa fuel discount cards ngadto sa 1,471 ka indibidwal nga mag-uuma sa mais sa Malaybalay City, Bukidnon.

Pinaagi sa Fuel Discount Program sa DA-10, ang matag kuwalipikadong mag-uuma sa mais nakadawat og discount card nga mokabat sa 3,000 pesos nga kantidad sa gasolina. Ang aktibidad gipasiugdahan sa City Agriculture Office niadtong Hunyo 28-29, 2022 sa Barangay 6 Covered Court.

Si DA-RFO 10 Regional Executive Director Carlene C. Collado nag-ingon, nga ang programa nagpadako sa paggamit sa mga makinarya sa uma alang sa taas nga produksiyon sa rehiyon.

Ang inisyatiba subay sa Special Provision No. 20 sa General Appropriations Act (GAA) para sa kasamtangang fiscal year o Republic Act No.11639. Ubos niini nga probisyon, adunay kinatibuk-ang kantidad nga P500 milyones ang gigahin aron mahatagan og diskwento sa gasolina ang mga mag-uuma sa mais, nga naggamit og makinarya sa ilang mga kalihokan sa pagpanguma.

Matud ni Richan D. Lacanaria, DA-10 Corn Program coordinator nga 9,500 ka mga mag-uuma sa mais sa tibuok rehiyon ang makabenepisyo sa maong programa nga adunay kinatibuk-ang kantidad nga P28 milyones.

Gipasiugda ni Lacanaria, nga ang mga kwalipikadong corn farmer-beneficiaries sa maong fuel subsidy nalista ubos sa Registry System for Basic Sectors in Agriculture (RSBSA); ug kinahanglan adunay tag-iya sa bisan unsang makinarya sa uma para sa produksiyon sa mais, o usa ka miyembro sa bisan unsang asosasyon/kooperatiba nga adunay magamit nga makinarya sa panguma nga gihatag sa bisan unsang ahensya sa gobyerno.

Ang nasangpit nga mga makinarya sa uma ilista unya sa Agricultural and Biosystems Engineering Management Information System (ABEMIS) alang sa katuyoan sa imbentaryo.

Nagpasalamat si City Agriculturist Remedios R. Sarzuelo sa ngalan sa mga mag-uuma na nakabenipisyo ani na programa. Dugang niini, nanghinaot siya na daghan pa na mag-uuma ang matabangan sa buhatan sa agrikultura sa maong siyudad alang sa kaayohan sa mga mag-uuma.

Si Zerubaben G. Lorenzo, presidente sa Aglayan Farmers Beneficiaries, Inc. mipaambit na dako iyang pasalamat sa fuel subsidy sa DA, ilabina nga nag-pandemya ug nagpadayon sa pag-usbong sa presyo sa krudo ug gasolina. Dako ang katabang ani sa pangkrudo sa traktor og shelleran sa ilang asosasyon.

Source: Department of Agriculture Region X

With report: Gecel Q. Ocon, City Agri-NADA