Ang lokal nga pangagamhanan sa syudad sa Malaybalay pinaagi sa buhatan sa City Civil Registrar Office (CCRO) aktibo nga mi partisipar sa gipahigayon nga programa nga giilang “Dugang Hatud Serbisyo ug Mass wedding,” sa Barangay Maligaya kaniadtong Nobyembre 16, 2022, ning syudad.

Pipila ka mga lumulupyo sa barangay ang natabangan sa maong programa sa ilang delayed registration sa ilang birth certificate ug sa mga gikinahanglan alang sa ilang mga clerical error sa ilang tagsa-tagsa ka mga birth certificate.

Sa pikas bahin, taliwala sa ka kusog nga hangin ug ulan wala na gayo’y makapugong sa kaminyoon sa siyam ka mga pares ug malipayong gi-solemnize ni Mayor Jay Warren R. Pabillaran.

Ang mga staff sa buhatan mao ang nag andam sa mga wedding decoration aron mas maanindot, memorable ug presentable ang mamahimung panaghiusa sa mga paresan isip legal na nga managtiayon.

Ang CCRO mapasalamaton sa aktibong partisipasyon sa mga lumulopyo sa barangay Maligaya, sa ilang barangay council ug mga kaslonon nga misayo sa pag-adto sa ilang orientation ayha pagasugdan ang seremonya sa kasal nga natapos nga mabulokon og malampuson.

Report: CCRO-NADA