Ang Departamento sa Agrikultura sa Rehiyon X sa padayon nga katuyoan niini nga madugangan ang produksiyon sa lokal nga pagkaon alang sa nasud naghatag og mga interbensyon sa mga mag-uuma sa humay. Inabagan sa lokal nga pangagamhanan sa Malaybalay pinaagi sa buhatan sa City Agriculture, usa sa mga programa niini nga Fertilizer Discount Voucher Program (FDV) ang gipatuman sa dakbayan.

Ubos sa FDV program, ang fertilizer discount voucher gamiton sa mga benepisyaryo sa mag-uuma sa pag-claim sa ilang gusto nga abono sa mga accredited nga merchants. Ang discount voucher adunay kantidad katumbas sa P1,131.00 matag ektarya alang sa mga lugar nga gitamnan ug inbred seeds, ug P2,262.00 matag ektarya alang sa hybrid.

Niadtong Septembre 6 hangtod 9, 2022, ang unang batch nga gilangkuban sa 302 ka mga mag-uuma nag-claim sa ilang mga abono sa Grower Agricultural Supply, Aglayan Malaybalay City gamit ang voucher nga giapod-apod ngadto kanila sa ilang Barangay Agriculture Extension Officers. Samtang niadtong Septiyembre 20 hangtod 23, ang ikaduhang batch nga gilangkuban sa 680 ka mag-uuma nakadawat sa ilang alokasyon. Alang sa ikatulong batch nga gilangkuban sa 393 ka mag-uuma ang gitakda pa. Adunay kinatibuk-ang 1,375 ka vouchers ang gigahin alang sa una ngadto sa ikatulo nga batch.

Mokabat ngadto sa ₱ 4,815.972.39 ang kinatibuk-ang kantidad nga gipagawas para sa una hangtod sa ikatulong batch gikan sa ₱9,450,636.00 nga alokasyon para sa dakbayan. Ang nahabilin nga mga voucher nga i-release sulod sa wet cropping season ipahigayon pagkahuman sa ikatulong batch. Kini naglangkob sa kinatibuk-ang 2,760 ka mga mag-uuma nga adunay 4,678 ka ektarya nga humay alang sa hybrid ug inbred, kon diin kini 94.06% sa 4,973.61 nga pisikal nga luna sa basakan sa tibuok Malaybalay alang sa tuig 2021.

Gilantaw sa CAgO nga makigtambayayong sa lain-laing ahensya ilabina sa Departamento sa Agrikultura aron maseguro ang igo nga pagkaon. Uban sa pagsaka sa presyo sa mga abono, kini nagtabang sa DA sa pagpatuman sa ilang programa agig suporta uban sa mga negosyante.

Ang pag gamit sa abono mahinungdanon aron madungagan ang produksyon ug pagkabaton ug pagkaon. Busa, ang pag-apod-apod sa abono maoy usa sa mga aktibidad nga gisuportahan sa mga programa sa DA aron matabangan ang mga mag-uuma nga bisan taliwala sa pandemya, ang inisyatibo nga discount vouchers sa abono dakong tabang aron maminusan ug mapadali ang pagpang apod-apod niini.

Reporter: Gecel Q. Ocon, NADA – City Agri