Ang City General Services Office mao ang nag-host sa unang convocation program sa lokal nga pangagamhanan sa Malaybalay alang sa tuig 2023 nga nag-angkla sa tema, “Stewardship: A Cornerstone for Good Governance.”

Gipahagiyon ang maong programa karong adlawa, Enero 16, 2023 diha sa People’s Hall, City Hall. Si Dr. Rizza Ramos-Conzad, ang kasamtangan director for center for innovative teaching and learning ug professor sa language and letters sa Bukidnon State University ang nahimong dinapit nga mamumulong.

Gisaysay ni Dr. Conzad kung unsa ka mahinungdanon ang tahas ug responsibilidad sa matag empleyado sa pagbantay ug pag-amping nga masigurado nga ang budget o pundo sa pang-gobyerno nagamit ug nagasto ba sa sakto. Sa tumong nga ang pagserbisyo sa publiko nakasentro sa kaayohan sa katawhan nga iyang gialagaran.

Sa iyang 25 ka tuig nga kasinatian isip government employee, iyang gipasabot ang lima ka pamaagi isip mga tinugyanan sa maayong pagdumala sa pang-gobyerno mao ang: gratitude, wise resource management, resourcefulness and innovation, synergy, ug courtesy and respect.

Sa mensahe usab ni City Mayor Warren Pabillaran nga iyang giutro ug giklaro nga dako atong tulobagon sa katawhan sa pag-gamit sa pundo sa salaping pang-gobyerno ngadto sa pag-implementar sa nagkadaiyang programa, proyekto ug kalihokan sa syudad sa Malaybalay.

“Atong gisiguro nga dayag ang atong serbisyo sama sa public bidding aron makabalo ang katawhan asa nagpadulong ang pundo kung nagasto ba kini sa sakto and should be accounted for down to the last centavo,” matod ni Mayor Pabillaran,

Kabahin sa kalihokan, gihatagan og pasidungog ang nagkadaiyang individual sa ilang mga nakab-ot nga nagdala ug dungog ug garbo sa syudad sa natad sa academe ug sports.

Gitugyanan usab ang mga kawani (regular) sa ilang loyalty award sa ilang dedikasyon sa trabaho sulod sa 20 ka tuig o sobra pa.

Gipresentar usab ang pasidungog nga nadawat sa PESO Malaybalay gikan sa Department of Labor and Employment mahitungod sa epektibo ug episyente nga pag-implementar sa mga programa ubos sa pagpangulo ni City Administrator, Atty. Anna Marie R. Bergado.

Sa ulahing bahin subli nalantawan ang mga mananaug nga kandidata atol sa napahigayon nga Miss Malaybalay niadtong Desyembre 28, 2022 didto sa Kaamulan Folk Arts Theater.

Si Miss Malaybalay winner Princess Rizza Bartolome sa barangay 7 maoy morepresentar alang sa umaabot nga Binibining Bukidnon 2023.