Kapin sa 700 ka pamilya sa dakbayan sa Malaybalay ang ming-gradwar sa Pantawid Pamilyang Pilipino Program kun 4Ps kaganinang buntag sa October 26, 2022.

Sa usa ka seremonyas nga gipasiugda sa social welfare and development office ning siyudad, (CSWDO) gitambungan ang maong graduation sa nailang singkwenta kapin ka representante sa maong programa.

Matod pa ni CSWDO Officer Ivy Amor Urbina, nasusi ug napamatud-an nga ang mga nailang 4Ps nakatagamtam na ug paglambo sa ilang ekonomikanhon nga estado, busa sila giklasipikar isip ‘graduates’ na sa maong programa. Dugang ni Urbina, magtasa na usab sila sa records alang sa mga pamilyang ihulip sa bag-ong ming-gradwar sa 4Ps.

Sa laing bahin, ang executive assistant ni City Mayor Jay Warren Pabillaran nga si Atty. Mitchell Talatala, nga mao’y mirepresentar kaniya mipadayag sa kalipay nga nakat-unan sa mga migradwar ang nagkadaiyang pamaagi sa pagpalambo sa ilang kahimtang pinaagi sa programa.

Sa iyang parte usab, misugil si schools division superintent Victoria V. Gazo nga dako kaayo ang natabang sa 4Ps diha sa mga tulunghaan. Siya mikanayon, “Niubos ang dropouts sukad naimplementar kani nga programa.” Midugang usa siya sa ilang pasalig sa DepEd nga mosuporta sa 4Ps kay nakita nila nga daghan magtulungha nga nakakab-ot ug kalampusan tungod nianing programa.

Ang representante ni Dr. Dennis P. Sangalang, ang City health officer, nga si Dr. Melirose S. Deticio, nagdayeg sa mga migradwar sa pagkakutlo nila sa mga leksyon ug kahanas sa panginabuhi ubos sa 4Ps program. Dugang ni Deticio, “Kami sa CHO andam kanunay mag-abag sa inyong panginahanglanon alang sa kabaskog sa inyong lawas, ingon man sa himsog nga mental nga kahimtang.”

Mipirma sa commitment of support sa pagpadayon sa 4Ps dinhi sa dakbayan ang mga stakeholders nga gipanguhan ni Col. Michelle Anoynar sa 403rd IB, ug PLt. Chariss Tagalog sa City PNP, uban sa mga department head nga mitambong ug ang ilang mga representante. Giturnover usab dayon ang listahan sa mga migradwar gikan sa DSWDO Field Office – X ug sa Provincial (Bukidnon) Link paingon ngadto sa CSWDO.