“Measure your Blood Pressure Accurately, Control It, Live Longer!” mao ang nahimong tema sa Hypertension awareness month celebration, nga gihimo didto sa Barangay Sinanglanan covered court ning dakbayan sa Malaybalay niadtong Mayo 31, 2024.

Gipangunahan sa City Health Office (CHO) ang pagpahigayon sa selebrasyon, diin kabahin sa mga lakang nga mapugngan ang hypertension mao ang pagpahibalo ug pagsabwag sa mga kasayuran ngadto sa mga katawhan ang kabahin sa hinungdan, pag-usab sa lifestyle, pagpanambal ingon man ang mga komplikasyon nga maangkon tungod sa hypertension. Ug alang sa pagka-alim sa maong balatian, ang padayon ug kanunay nga pag-inom sa tambal nga gimintinar adunay mahinungdanon nga papel sa pagkontrol sa presyon sa dugo.

Tumong sa pagpahigayon sa maong kalihukan nga makunhuran ang morbidity ug mortality rate nga dala sa high blood pressure ingon man pagtabang niadtong mga tawo nga hypertensive nga ma kontrol ang ilang blood pressure, aron dili na madungagan ug uban pang komplikasyon lakip na ang stroke, heart attack, kidney problems ug uban pang mga cardiovascular diseases nga dala sa taas nga dugo.

Si. Dr. Jude Rey C. Pagaling ang nahimong dinapit nga mamulong ug gitambongan usab kini nila ni Dr. Ann Michelle C. Go, ang non-communicable disease medical coordinator, Fritzie P. Talatala, non-communicable nurse coordinator, ug Kristine P. Rojas, non-communicable disease assistant nurse coordinator, tanan gikan sa CHO.

Anaa usab ang representante ni City Mayor Jay Warren R. Pabillaran nga si Ms. Jade Awa, Punong Barangay Hon. Nilo P. Aldeguer, Ms. Mercy Sinto, ang midwife sa Sinanglanan ug mga personahe gikan sa Human Resource Health- Center for Health and Development Northern Mindanao (HRH-CHDNM).

Lakip sa kalihukan nga gipahigayon, ang pag pang konsulta ug pagpanghatag sa mga maintenance nga mga tambal ngadto sa mga mitambong.

Report: Lianne Jones T. Cajegas, PTRP
PT Unit Staff/CHO NADA