Giaprobahan na sa Sangguniang Panlungsod ang Ordinance No. 1029 S 2023 nga mao ang ordinansa sa paghatag ug insentibo alang sa mga negosyante nga nag empleyo ug senior citizen ug Person with Disabilities (PWD).

Atol sa ika 46 th nga regular session niadtong June 6, 2023, unang giduso ni Konsehal Niko P. Aldeguer ang nasangpit nga ordinansa ug gipasa kini sa Committee on Health and Social Welfare Services nga gipanguluhan ni Hon. Kathleen Cecille Pagaling alang sa dugang pagtuon.

Pinasubay sa nasudnong balaudnon o Republic Act No. 9994 – nga mao ang “Expanded Senior Citizens Act of 2010”, ang pangagamhanan nagmando nga ang mga senior citizen pagahatagan ug saktong suporta alang sa pagpalambo sa ilang partisipasyon sa komunidad.

Sumala sa Section 5 sa R.A. No. 7277, ang Magna Carta for Disabled Person, kini nag mando usab nga walay PWD nga mabalibaran kung siya kwalipikado sa pagpanarbaho ug kini
makakuha ug patas nga pribilihiyo, sweldo, allowance, ug uban pang mga benepisyo susama sa uban nga mga empleyado.

Nasayran nga ang senior citizen ug PWD maoy labing napasagdan nga sektor sa katilingban ug nagkinahanglan ug dugang atensyon ug proteksyon.

Basi sa maong ordinansa, ang lokal nga pangagamhan maghatag ug tax incentive ngadto sa mga employer aron pagdasig sa mga pribadong kompanya ug mga negosyante nga mag empleyo ug mga senior citizen ug PWD kung sila kwalipikado, andam ug makahimo pa sa pagtrabaho, ug paghatag kanila sa training aron mapalambo ang ilang mga abilidad sa pagpanarbaho.
Ug human sa masusing pagtuon, atol sa ika 67 th regular session niadtong Nobyembre 7, 2023, hiniusang giuyunan sa konseho ang pag aproba sa maong ordinansa ug kini gi-aprobahan usab ni City Mayor Jay Warren Pabillaran niadtong Novembre 21, 2023.

Tungod niini, mas mahatagan ug higayon kadtong mga kwalipikadong Senior Citizen ug PWD nga makasulod sa trabaho ug madasig usab ang ubang kompanya sa pagdawat kanila.

Report: SP-NADA