Agi ug pagsaulog sa Indigenous Peoples Day, ang lokal nga pangagamhanan sa Malaybalay pinaagi sa City Planning and Development Office ang nag-host sa Second Monday Convocation program haum sa maong selebrasyon, Agosto 8, 2022 diha sa Peoples Hall, City Hall, ning syudad.

Nagdala sa tema “Indigenous Peoples as Partners in Resource Management,” gitambongan sa dinapit nga bisita nga si Fr. Pedro Walpole, SJ, ang Director of Research sa Institute of Environmental Science for Social Change, Philippines. Kauban usab nga nihatag sa ilang mensahe isip tingog ug resepresentante sa Lumad mao si Mr. Jason Menaling ug Councilor Rene “Datu Makayuba” Sumbongan.

Ang nasangpit nga mga mamumulong nagsaysay sa kamahinungdanon, kadako ug kahalapad sa tagsa-tagsa ka tahas sa mga indigenous peoples, hilabi na diha sa paghisgut sa malungtaron nga kalihokan ug katungod diha sa pagdumala sa kinaiyahan isip katimbayayong sa direksyon ug plano nga pagapadulngan sa atong pang-gobyerno.

Tumong usab sa maong programa nga mapasundayag ang kulturanhong hiyas sa lumad ug ang pagprotektar niini ug ang pagluwas sa atong biodiversity taliwala sa hulga sa bag-ong panahon.

Sa mensahe ni Mayor Jay Warren R. Pabillaran, iyang gipadayag ang dako nga hagit sa mga empleyado alang sa pagpakabana sa atong kaakohan nga mahatagan ug igong pagtagad ug aksyon ang mga plano, palisiya, ug aktibidades nga may kalambigitan sa mga nagkadaiyang resources nga adunay kalabutan sa ancestral domain ug mga isyu nga nakapalibot niini.

Nitambong usab sa programa ang mga miyembro sa Sangguniang Panlungsod nga sila si Councilors Brian Flores, Dindo Dinlayan, Melchor Maramara, Cromwell Kiril Dinlayan, Roy Orquia, Christopher Soria, Alan Ryann Legaspi, Bonifacio Valiente, ug Dave Julian Balore.