Gipasiugdahan sa City Agriculture Office ang second Monday convocation program nga na-angkla sa tema: “Empowering Young Agripreneur as Partner for Agriculture and Economic Development,” karong adlawa, Oktobre 10, 2022, didto sa People’s Hall.

Tumong sa maong programa nga mag-aghat sa mga kabatan-onan sa pagtuon sa pag-uma ug pagpalambo niini isip agripreneur. Sa mensaheng pagbukas ni City Agriculturist Remedios R. Sarzuelo, iyang gisaysay nga nakasinati na ang atong nasod sa aging population sa sektor sa agrikultura diin kasagara mag-uuma nag-edad 56-60 anyos.

Dugang pa ni Sarzuelo nga ang gobyerno andam motabang sa mga young agripreneurs isip usa sa mga prayoridad nga makatubag sa atong gisagubang nga sitwasyon aron sa pagsiguro sa food security ug economic development. Isa na ang paghatag og access to credit, technical assistance, ug pag-market sa ilang abot ug produkto.

Usa ka inilang batan-on nga agripreneur gikan sa syudad sa Malaybalay nahimong imbitadong mamumulong nga si Edsel James O. Quemado, Jr. Sa edad 24 anyos ug 4H National Awardee, siya ug kauban iyang igsoon nanag-iya sa Mushroom City nga nahimotang sa Brgy. Kalusangay, Malaybalay City.

Sa iyang mensahe, iyang gidasig ang mga kabatan-onan nga adunay dako nga potensyal sa pag-uma ug pag negosyo. Dako iyang pasalamat pinaagi sa kooperasyon ug assistance gikan sa nagdaiyang ahensya sa gobyerno nga milambo isip agripreneurs.

Gilauman ni Quemado nga daghan pa kabatan-onan ang mobuhat ug lakang nga masunod ilang kalampusan aron usab kini makahatag ug panginabuhian sa usa ka komunidad. Iyang gilantaw nga maila ang Malaybalay nga producer sa mushroom dili lang sa Pilipinas apan apil sa gawas sa nasod.

Ang Mushroom City usa na sa giilang agicultural learning site ug agi-eco tourism site. Bukas ang ilang area para sa bisita, pamilya ug sa tanan nga gusto magtuon sa ilang pasilidad.

Sa mensahe ni Mayor Jay Warren R. Pabillaran iyang gipaklaro ang hugot nga suporta sa agriculture sector nga mapundohan ug matabangan ang susamang pagpaningkamot ug kalamposan nga gipakita ni Mr. Quemado. Iyang panawagan nga tabangan sa katawhan sa Malaybalay nga ma promote ang nagkadaiyang local products, ingon man ang mag-uuma ug negosyante sa atong syudad.