Agi ug pagsa-ulog sa Philippine Heart Month sa bulan sa Pebrero, ang buhatan sa City Health mipahigayon ug programa gahapong adlawa, Pebrero 21, 2023 didto sa barangay 3 covered court ning syudad sa Malaybalay.

Nagdala sa tema “ Gulay at Prutas, Araw-arawin, Matamis, Mamantika, at Maalat Hinay-hinayin”, gipa-ambit ni Dr. Ann Michelle Go, Rural Health Physician ug Non-communicable Disease Coordinator ang mga importanteng pagtulun-an alang sa himsog nga panglawas ilabi na gayud ang bahin sa kahimsog sa kasingkasing. Midugang usab si Ms. Edna Fe Pendatun, RN sa pagpa-ambit kabahin sa sakto nga pamaagi sa pagpamuyo aron maangkon ang mahimsog nga panglawas ilabi na gayud sa mga senior citizens.

Ang pagpahigayon sa maong kalihukan gihimo aron mahatagan ug dugang kahibalo ang mga katawhan ilabi na ang mga senior citizens ug kadtong adunay mga nagkadaiyang mga balatian aron usab sila makapadayon sa ilang inad-law-adlaw nga pamuyo nga himsog ingon man ma-monitor ang ilang mga blood pressure (BP) ug makapa-konsulta sila sa panahon nga dili mayo ang ilang pamati ug mahatagan sa ilang mga maintenance nga tambal.

Mitambong usab sa kalihukan sila si Punong barangay Lyzander Cedric D. Maandig ug kagawad Ma. Dolores G. Rulloda sa barangay 3, CHO Midwife IV Wilfreda A. Jardinico ug uban pa gikan sa buhatan sa City Health.

Human sa programa gipahigayon ang BP monitoring, konsultasyon, Zumba ug ang pagpanghatag ug mga bitamina ug maintenance nga mga tambal sa 46 ka partisipante nga mga senior citizens ug comorbid patients.

Report: Lianne Jones T. Cajegas, CHO-NADA