Ang City Health Office (CHO), inabagan sa Provincial Health Office ug Department of Health (DOH) nagpahigayon ug programa nga giilang “KILATIS KUTIS 2022” didto sa Barangay Caburacanan, Malaybalay City niadtong Oktubre 26, 2022.

Kini nga kalihokan gipartisiparan sa barangay officials, midwives ug mga residente sa Barangay Caburacanan. Nagpadayag usab ug suporta sa maong aktibidad ang atong doktor sa Malaybalay City Health Office nga si Dr. Susan Marie S. Punongbayan uban ni Ms. Maila Manuel, RN, mga nurses sa DOH kauban ni Mr. Marlon Yongco, RN.

Naghatag si Dr. Joven G. Flores, usa ka Medical Officer sa syudad sa Valencia sa iyang mensahe isip dinapit nga bisita ug nagpaambit sa iyang kahibalo mahitungod sa sakit nga “Leprosy”. Iyang gihisgutan ang mga simptomas, ug ang hinungdan sa sakit. Gipasabot niya sa mga tao nga dili angay ikaulaw ug ikahadlok tungod kay kini matambalan.

Nagpahigayon usab og konsultasyon kabahin sa sakit sa panit ang mga doktor samtang naghatag ug mga tambal ang mga DOH nurses. Dako pud ang kalipay sa mga batang residente nga nitambong sa maong programa tungod kay gihatagan sila sa bag-o nga tsinelas.

Ni: Lianne Jones Tuazon-Cajegas, CHO-NADA