Ubos sa implementasyon sa Livestock Intensification Program, ang buhatan sa City Veterinary Office (CVO) mitabang sa paghulma aron mamugna ang Purok Langcog Livestock Farmers Association sa Barangay Can-ayan.

Gipaningkamotan sa CVO, kauban ang barangay extension workers nga gipangulohan ni Dr. Omar T. Cahanap, nga maorganisa ang grupo aron marehistro ug masertipika sa Department of Labor and Employment (DOLE). Kini naghatag og dugang nga oportunidad sa mga mag-uuma aron maka-avail sa mga programa ug serbisyo nga makapauswag sa ilang operasyon.

Ang mga mag-uuma midayeg sa hugot nga suporta sa lokal nga kagamhanan, ilabi na kang Mayor Jay Warren R. Pabillaran, nga girepresentahan ni Jun Dumala, staff sa City Mayor’s Office, atol sa gipahigayong kalihokan niadtong Oktubre 15, 2024, didto mismo sa Purok Langcog, Can-ayan.

Gilauman ni Dr. Cahanap nga dili lang kini ang katapusan, kay plano nilang mamugna og daghan pang asosasyon sa nagkadaiyang barangay aron makab-ot ang usa ka hiniusang Malaybalay City Livestock Farmers Federation nga morepresentar sa City Agricultural and Fisheries Council (CAFC).

Report: Dr. Omar T. Cahanap, CVO-Nada