Atol sa gipahigayon nga 2nd Monday Convocation Program sa bulan sa Oktobre niadtong Oktobre 10, 2022 didto sa Peoples Hall sa New City Hall nga gitambongan sa mga opisyales ug kawani sa lokal nga pangagamhanan sa Malaybalay gitunol ang mga pasidungog ngadto sa lain-lain personahe sa nagkadaiyang natad.

Pinaagi sa Resolution of Commendation nga gi-sponsoran sa tanang miembro sa Sangguninag Panlungsod sa Malaybalay, gitunol ang usa ka Plaque of Recognition ngadto sa Barangay Kalasungay agi ug pagdayeg isip National Passer sa Seal of Good Local Governance for Barangays (SGLGB) sa tuig 2021 nga gipahigayon sa Department of Interior and Local Government (DILG) nga naghatag usab ug pag-ila ug dungog sa syudad sa Malaybalay.

Tungod usab sa makanunayon nga outstanding performance sa barangay Kalasungay sa local governance sa mga nangaging tuig, na-angkon ang maong kalampusan.

Pinaagi gihapon sa usa ka Resolution of Commendation gikan sa Sangguniang Panlungsod sa Malaybalay, gitunol ang Plaque of Appreciation ngadto sa Malaybalay City Police Station nga gipangulohan ni Police Lieutenant Colonel Ritchie A. Salva isip Best City Police Station sa Region 10.

Ang maong plake gitunol agi ug pag-ila sa hugpong sa kapolisan sa Malaybalay sa ilang dedikasyon ug pagkamalahutayon aron mamintinar ang kalinaw ug kahusay sa Malaybalay bisan pa sa kakulangon sa mga personahe niini ug angayan lamang kini nga ilhon agi ug dungog ug garbo sa syudad sa Malaybalay.

Ang maong pasidungog na-angkon atol sa 121st Police Service Anniversary niadtong Septyembre 5, 2022 didto sa Camp Alagar, Cagayan de Oro City.

Si PLTCOL. Ritchie A. Salva midawat usab sa Plaque of Recogniton tungod sa paghatag ug dungog sa Malaybalay sa iyang maayong pagdumala ug dedikasyon isip hepe sa kapolisan sa dakbayan nga nahimong Best City Police Station sa Rehiyon 10. Ang maong plake gipirmahan ni City Mayor Jay Warren R. Pabillaran, Vice Mayor Estelito R. Marabe ug tanang miembro sa konseho sa Malaybalay.

Ingon man, isip pag-ila sa tanang active nga miembro sa kapolisan sa Malaybalay, pagatunolan usab sila sa Certificate of Commendation alang sa ilang efficient and exemplary diligence sa ilang pag hatag ug serbisyo nga nakapahimo sa Malaybalay nga Best City Police Station sa rehiyon 10. Ang maong mga sertipiko pinirmahan ni retired Police General Royland M. Orquia, SP committee chair on Peace & Order and Public Safety, Mayor Pabillaran ug Vice Mayor Marabe.

Laing Plaque of Recognition pinirmahan sa tanang opisyales sa Malaybalay ang gitunol usab ngadto kang Fire Officer lll Russel Carbajal Bacawag sa paghatag ug dungog sa Malaybalay sa pagpakita niini ug talagsaong kusog ug talento sa pag-kompleto sa 1,506 kilometer bike-ride gikan sa Luneta Park sa kaulohan paingon dinhi sa syudad sa Malaybalay kon diin nag promote usab kini sa eco-friendly lifestyle pinaagi sa pag gamit sa iyang ginama nga “bambukid” bike gikan sa lokal nga mga materyales.