Ang Department of Labor and Employment (DOLE) uban sa koordinasyon sa City Government sa Malaybalay pinaagi sa Public Employment Service Office (PESO) nag turn-over sa Indalasa Youth Association sa ilang Community Store Project nga nagkantidad og 250,000. Samtang 25 ka mga lumolupyo sa Purok 6 nakadawat sa ilang Solar Light Package niadtong Setyembre 26, 2023 sa Indalasa, Malaybalay City.

Gisaksihan ang kalihukan sa mga opisyal sa barangay, gipangulohan ni Punong Barangay Gina Pailagao, si Executive Assistant II Anthony Mondia nga nagrepresentar kang City Mayor Jay Warren Pabillaran. Kauban usab ang mga Accredited Co-Partners gikan sa Kaanib Foundation nga si Erlinda Sagayo, ug gikan sa Abag Kalambuan nga si Bobo Narciso, ingon man ang mga personnel gikan sa 88th Inf Brigade, Philippine National Police og PESO.

Si Mr. Mondia sa iyang mensahe mi-ila sa maanindot nga koordinasyon sa mga opisina sa gobyerno ug sa mga non-government offices sa paghatag serbisyo ngadto sa mga nanginahanglan. Iyang gipasabot nga adunay nagkalahi lahi nga gobyerno ang pwede madangpan sa atong katawhan. Dako iyang pasalamat sa DOLE nga ang atong syudad naka ambit sa pondo aron mapaabot ang mga nagkadaiyang livelihood projects sa mga residente sa Malaybalay.

Ang Philippine Army ug PNP mipaabot sa ilang pagpasalamat sa mga kagamhanan nga nitabang sa mga proyektong panginabuhian sa katawhan. Para kanila, kini usa sa mahimong paagi sa paglutas sa mga insurgency sa komunidad.

Ang mga Accredited Co-Partners mi-pasidungog sa DOLE ug PESO sa pagpaluyo sa mga proseso sa mga dokumento nga maangkon kini nga mga proyekto. Ilahang gikalipay nga ang ilang organisasyon mamahimong instrumento sa paglambo sa ekonomiya sa mga komunidad.

Ang mga benepisyaryo nagpaabot sa ilang dakong pasalamat nga nakita nila nga niabot kanila ang tabang sa gobyerno. Ilahang nabati nga ang sama nila nga nagpuyo sa layong mga dapit adunay importansiya sa komunidad.

Ang PESO magpadayon sa pagpaabot sa serbisyo ug pag implementar sa mga programa nga makatabang sa mga nanginahanglan, labi na sa mga miyembro sa marginalized sectors.

Report: PESO Malaybalay – NADA