Gipasigarbo sa syudad sa Malaybalay ang usa ka prestihiyosong pasidungog sa maayong pagdumala sa pang-gobyerno human kini nakuha ang giilang Seal of Good Local Governance (SGLG) nga gikan sa Department of Interior and Local Government (DILG).

Personal nga gidawat ni Mayor Jay Warren R. Pabillaran kauban si Vice Mayor Estelito R. Marabe ug City local government operations officer Amalia A. Propia ang SGLG award didto sa The Manila hotel, Metro Manila niadtong Desyembre 15, 2022.

Nakadawat usab ang Malaybalay og ganti nga salapi o incentive fund subisidy nga nagkantidad Php 7 million.

Sa mensahe ni Mayor Pabillaran atol sa 2nd Monday convocation program sa milabayng simana, iyang gipasalamatan ang mga paningkamot sa mga opisyales ug mga empleyado sa ilang tagsa-tagsa nga tahas ug responsibilidad.

Ang SGLG award gipalig-on pinasubay sa Republic Act 11292 nga nagsilbi nga sumbanan ug sukdanan sa performance ug incentive sytem alang sa mga LGUs.

Gilantaw sa maong mekanismo ang natad sa pang-gobyerno mao ang (1) fiscal/financial administration and sustainability, (2) disaster preparedness, (3) social protection and sensitivity program, (4) health compliance and responsiveness, (5) programs for sustainable education, (6) business-friendliness and competitiveness, (7) safety, peace and order, ( environmental management, (9) tourism, heritage development, culture and the arts, and (10) youth development.