Ang Department of Labor and Employment (DOLE) midayeg sa paningkamot ug kalampusan sa Malaybalay Public Employment Service Office (PESO) isip giilang Best Performing PESO para sa tuig 2022 diri sa probinsya sa Bukidnon.

Naangkon ang pasidungog sa lokal nga pangagamhanan pinaagi sa Malaybalay PESO tungod kay nakabot ang 100% rating sa sistema ug mekanismo aron makatabang nga mapadali ang pagpangita og trabaho sa katawhan.

Kauban sa mga awards nga gitunol ni DOLE provincial head Raul Valmores ug DOLE-X regional director Albert E. Gutib niadtong Desyembre 14, 2022 didto sa Quezon, Bukidnon mao ang: Best in Livelihood Liquidation – LGU Malaybalay, Top 2 in Fund Utilization for Special Program for the Employment of Students (SPES) implementation, ug Top 3 in No. of Youth Employed through SPES.

Gipresentar ang nasangpit nga awards niadtong Enero 16, 2023 atol sa Monday convocation program sa People’s Hall, City Hall.

Tungod sa epektibo ug episyente nga pag-implementar sa mga programa ubos sa pagpangulo ni City Administrator, Atty. Anna Marie R. Bergado isip kasamtangan nga PESO manager, gilauman nga mapadayon ug mapalambo pa ang nasugdan pinaagi usab sa hugot nga suporta ni Mayor Warren R. Pabillaran.