Duyog sa kasaulogan sa 50th Araw Ng Barangay St. Peter, ang City Civil Registrar sa dakbayan sa Malaybalay inubanan sa Barangay Council sa St. Peter, nag pahigayon ug usa ka mass Wedding niadtong November 25, 2022, ala-una sa hapon didto sa barangay covered court.

Trentay-uno (31) ka paresan ang malampusong nakasal ni City Mayor Jay Warren R. Pabillaran, kinsa mipadangat sa iyang mensahe nga nagkanayon “kani nga adlaw, inyo kini nga adlaw, kamu ang espesyal karun nga hapon ug wala kamo’y angay ika ulaw”.

Pipila ka paresan ang gipamalitan sa mga maloyloy-on nga katawhan ug bisti sa haduol nga ukay-ukayan, kay lagi daghan kanila ang wala gayuy tarung nga bisti. Beinte kuatro (24) ka paresan sa mga kinasal ang gikan pa sa sitio Balaudo nga sakop sa maong barangay. Kahibaloan nga molungtad ug usa ka adlaw ang gikinahanglan nga baklayon sa mga lumolupyo una sila makaabot sa ilang pinuy-an gikan sa barangay hall sa St. Peter.

Ang mga kawani sa CCR nangandam sa mga wedding decorations isip pag hatag ug dugang suporta ug pagpahinungod sa mga kaslonon. Ingon man, miabag usab sila kuyog ang pipila ka mga kawani sa barangay sa pag pasabot sa mga kaslonon sanglit ubay-ubay kanila ang dili makasabot sa pinulungang binisaya.

Tumong sa maong programa nga daghan ang makasal nga managtiayon hilabi na kadtung aduna nay mga anak, kon diin human sa paghi-usa kanila, mamahimo nang legitimate ang mga anak niini kinsa nahimugsu sa wala pa sila gikasal.

Pipila usab sa mga gikasal, ingon man sa mga nakasaksi nga mga opisyales sa barangay ang mitulo ang luha sa kalipay atol sa pagpahigayon sa kalihukan .Milungtad ang seremonya hapit sa tulo ka oras nga puno sa kalipay.

Ang City Civil Registrar Office pinaagi ni Mr. Arnel S. Alagenio, City Civil Registrar-OIC, mapasalamaton usab sa konseho sa barangay St. Peter sa ilang gihimong pagpangandam alang sa kalampusoan sa maong kalihukan.

Report: NADA – CCR