Niadtong Pebrero 24, 2022 ang buhatan sa City Agriculture Office (CAgO) nagdumala og programa alang sa mother class culmination didto sa Brgy. Managok Covered Court, ning syudad.

Ang Rural Improvement Club (RIC) sa Barangay Managok maoy nakadawat sa maong programa ug nagsugod ang ilang klase niadtong Disyembre 20, 2022.

Ang mga topiko nga gituki mao ang role of women as caretakers, role of women as educators, role of women in agriculture, agri-preneurial skills enhancement, ug financial literacy.

Nagkantidad og Php 32,000, lakip na ang training kit para sa pagproseso og karne na ilang nadawat sa maong programa.

Gitambungan nila ni Mayor Jay Warren R. Pabillaran, City Councilors Alan Ryann O. Legaspi, Niko P. Aldeguer, Winky A. Damasco, ug Dindo D. Dinlayan, Barangay Captain Aries Vincent B. Jurolan, Kagawad Committee on Agriculture Joseph Reyes, ug RIC President Enemencia M. Visto ang nasangpit nga kalihokan.

Uban usab kini sa CAgO nga gipangulohan ni City Agriculturist Remedios R. Sarzuelo nga girepresentahan ni Supervising Agriculturist Vic Ian T. Alcontin, IDS-OIC Owen Hazel Q. Lagria, RIC Coordinator Maridol F. Guinita, ug uban pang mga personahe sa maong buhatan.

Atol sa programa, sa mensahe ni Mr. Alcontin, ang CAgO nagasuporta usab sa women’s empowerment, dili lamang sa extension management sa lain-laing mga programa sa pananom nga gipatuman sa mga barangay.

Dugang pa, iyang gipasiugda ang kamahinungdanon sa gender and development para sa pagdumala sa panginabuhian.

Gidasig usab niya ang mga partisipante nga dili lang sa paghimo og produkto apan apil na ang pagmerkado niini.

Sa mensahe ni Konsehal Legaspi iyang gi-awhag sa kababayen-an sa pagpahimulos sa matag kahigayonan alang sa ilang kaayohan. Matud pa usab niya nga ang Sangguniang Panglusod nagpadayon sa ilang suporta aron masiguro ang pag-uswag sa ilang panginabuhian.

Gipadayag usab ni Mayor Pabillaran ang mga sakripisyo sa mga inahan nga ilang nahimo alang sa ilang pamilya ug sa komunidad.

Nalipay siya nga adunay dugang kita ang mga kababaenhan sa barangay ug gidayeg ang mga nakahuman sa programa. Giawhag usab niya nga himuong produktibo ang ilang mga mabuhat pinaagi sa pagbaligya sa ilang mga produkto diha sa dakbayan.

Ang Mother Class nagtumong sa paghatag og suporta sa mga kababayen-an ug paghatag kanila sa livelihood skills. Lakip niini ang importante nga papel sa kababayen-an sa modernong katilingban nga nagpalambo pa sa usa ka lig-on nga pamilya. Nahimo ang kamahinungdanon nga tahas isip asawa, ekonomista, inahan, disciplinarian, magtutudlo, ug suga sa pamilya sa samang higayon.

Sa kinatibuk-an, ang babaye adunay mahinungdanong papel alang sa kalambuan sa katilingban.

Ni: Gecel Quinquiño-Ocon, City Agri-NADA