Ang City Disaster Risk Reduction and Management Office (CDRRMO), pinangulohan ni Chief Alan J. Comiso nanguna sa usa ka National Simultaneous Earthquake Drill (NSED) para sa 4th Quarter tuig 2022 didto sa Airport Village Elementary School ug sa Malaybalay City Police Station (MCPS) niadtong ika-10 sa Nobyembre 2022.

Ang kalihokan gidesinyo ug giapilan sa mga magtutudlo, estudyante, ug mga opisyal sa kapulisan aron sulayan ang mga kapasidad sa institusyon ug ang ilang tagsa-tagsa ka kahibalo mahitungod sa pagpangandam ug pagtubag sa kalamidad sa linog.

Dungan sa hingpit nga pagpatuman sa face-to-face nga klase, ang katuyoan niini mao ang pagbansay, pagtudlo, ug pag-andam sa matag indibidwal, sulod man o gawas sa ilang eskwelahan, opisina, o bisan unsang building ug kung unsa ang ilang buhaton panahon sa kalamidad o kung adunay katalagman.

Sa eksaktong alas nuebe sa buntag, nagsugod ang alarma nga nagtimaan sa pagsugod sa NSED. Ang mga partisipante mihimo sa teknik nga “Duck, Cover, and Hold” ug dayon mibakwit ngadto sa gitudlo nga evacuation area. Ang CDRRMO evaluation team anaa usab sa pag-evaluate sa mga miapil nga mga opisina. Adunay usab mga medical response team aron susihon kung adunay nasamdan sa drill.

Human niana, gihimo ang feedbacking activity, ug ang mga rekomendasyon alang sa pagpalambo sa sunod nga drill mao ang pag-apil sa tanan sa drill, paghimo og emergency preparedness plan, ug evacuation plan.

Report: CDRRMO-NADA