Giaprobahan na sa Sangguniang Panlungsod ang Ordinance No. 1039 S 2024, nga mao ang ordinansa sa pag-institutionalize sa Clean-As-You-Go (CLAYGO) sa mga lugar kan-anan ug uban pang mga establisiyemento dinhi sa siyudad sa Malaybalay. Kini nga hakbang nagpunting sa pag-promote sa kalimpyo ug kahapsay sa mga pampublikong lugar, ug pag-baton sa disiplina sa mga residente sa siyudad.

Si Konsehal Roylan M. Orquia ang author sa maong ordinansa, ug gi-refer kini kang Konsehal Alan Ryann O. Legaspi isip Chairman sa Committee on Environment & Natural Resources. Ang CLAYGO usa ka praktis nga dugay nang ginabuhat sa ubang mga nasud, nga nagpakita sa pag-atiman sa kalimpyo sa palibot ug pagprotektar sa maayong panglawas.

Sa atong komunidad, naandan na sa katawhan nga kung mangaon sa mga kan-anan o restaurant, biyaan lang ang ilang mga kinan-an ug pasagdan na ang mga crew o waiter ang maghipos o maglimpyo sa mga lamesa. Kini sukwahi sa prinsipyo sa CLAYGO, nga nag-awhag sa mga tawo nga manglimpyo sa ilang kaugalingong mga ginamitan ug dili magsalig sa uban.

Ang tumong sa nasangpit nga ordinansa mao nga matudloan ang katawhan nga mahimong responsableng lungsoranon, mag-atiman sa kalimpyo sa palibot, ug magtudlo sa mga kabataan sa maayong pamatasan aron mahimong maayong ehemplo sa umaabot nga generasyon. Dugang pa, ang ordinansa nagtinguha nga malikayan ang pagtakboy sa mga sakit ug maprotektahan ang maayong panlawas sa katawhan.

Human sa masusing pagtuon, atol sa ika-94 nga regular session niadtong Hunyo 4, 2024, hiniusang giuyunan sa konseho ang pag-aproba sa maong ordinansa. Kini gi-aprobahan usab ni City Mayor Jay Warren R. Pabillaran niadtong Hulyo 9, 2024. Ang iyang pag-aproba nagpakita sa iyang suporta sa mga programa nga nagpunting sa kalimpyo ug kahapsay sa siyudad.

Tungod niini nga ordinansa, gilauman nga mas mailhan ug mahatagan ug importansya ang kahapsay ug kalimpyo sa palibot dinhi sa atong siyudad.

Report: SP-NADA