Giaprobahan na sa Sangguniang Panlungsod ang Ordinance No. 1032 S 2023 mao ang ordinansa sa pagpangrehistro sa mga binuhing hayop sa kabarangayan sa siyudad sa Malaybalay.

Unang giduso ni konsehal Alan Ryann O. Legaspi ang ordinansa mahitungod sa pagpa rehistro sa mga binuhing hayop sa kabarangayan kaniadtong Hulyo 25, 2023 atol kini sa ika-53 regular session.

Nasayran nga ang pagpangrehistro sa mga kahayupan mao ang pagsiguro nga matabangan ang mag-uuma sa pagpalambo ug pagprotektar sa mga binuhing hayop pinaagi sa paghatag kanila sa tabang teknikal.

Dugang rason sa maong ordinansa nga masiguro nga ang mga binuhing hayop himsog, bakunado ug luwas kini sa mga sakit nga posibleng makatakod sa ubang hayop ug mga tawo.

Gisiguro usab sa maong ordinansa nga malikayan ang pagkuyanap sa mga sakit pinaagi sa pag monitor niini.

Human sa masusing pagtuon, atol sa ika-70 regular session niadtong Nobyembe 28, 2023, hiniusang giuyunan sa konseho nga aprobahan ang maong ordinansa ug gi aprobahan usab kini sa atong City Mayor Jay Warren Pabillaran kaniadtong Disyembre 4, 2023.

Tungod niini, mas mapalambo pa ang mga mag-uuma ug maprotektahan ang mga kahayopan ug katawhan sa mga makatakod nga sakit.

Report: SP-NADA