Giaprobahan na sa Sangguniang Panlungsod ang Ordinance No. 1006 S 2022 nga mao ang Organic Farmers Ordinance sa syudad sa Malaybalay.
Kini pinasubay sa Republic Act (RA) 10068 ug gi amendahan sa RA 11511 nga nag mando sa pagpalambo ug pag implementar sa pag gamit sa organic agriculture ug pag promote sa community-based organic agriculture system.
Nasayran nga ang organic farming magasubay kini sa ekolohikal nga mga proseso ug pag recycle, diin makulangan ang pag gamit sa mga pestisidyo ug uban pang mga kemikal nga gamit sa pag panguma.
Aron makab-ot ang tumong ug tinguha nga natala sa maong Republic Act, ang syudad sa Malaybalay nag gahin ug pundo alang sa mga sertipikado nga mga organic farm aron madasig usab ang katawhan sa pag gamit ug organic farming.
Si Hon. Niko P. Aldeguer ang nahimong author sa maong ordinansa, ug co-authored ni Hon. Alan Ryann O. Legaspi ug hiniusang gi-uyonan usab sa konseho niadtong Nobyembre 15, 2022 atol sa ilang ika-18 nga regular session.
Tungod niini, mahatagan ug katumanan ang maong balaudnon ug mas mapadali ang paghatag sa financial o dugang capital ngadto sa mga sertipikado nga mga organic farmers sa syudad sa Malaybalay.
Report: NADA – SP