Usa ka mahinungdano’ng groundbreaking ceremony ang gipahigayon sa Flores Village, Brgy,. Linabo niadtong Hulyo 18, 2022 human sila nagahinan ug nagkantidad PhP 25 milyon nga mga proyekto.

Ang seremonyas hudyat sa pagsugod sa pag-semento sa dalan ug drainage diha sa Flores Village sa Brgy. Linabo. Aduna’y balor nga Php 20 milyon ang maong proyekto nga dugay na gihandum sa lumolupyo sa maong housing subdivision. Lakip pagatukoron didto ang usa ka multi-purpose building nga nagkantidad Php 5 milyon.

Ang ground breaking gipangunahan ni Atty. John T. Flores, ang congressman sa Bukidnon 2nd District. Sa parte sa City Government of Malaybalay, girepresentan si City Mayor Jay Warren R. Pabillaran ni Executive Assistant II Antonio Mondia.

Ang maong seremonya giubanan sa regional director sa DHSUD nga si Ariel Abragan. Nitambong usab sa maong kalihukan si Konsehal Brian Nelson Flores, mga opisyales sa Brgy. Linabo ug sa asosasyon sa homeowners, ug uban pang lumilihok sa maong mga proyekto.

Nasayran nga si Cong. Flores ang naglihok para mapunduhan kaning mga proyekto para sa maong housing area sa Linabo, ug gigahinan sa Department of Human Settlements and Human Development (DHSUD). Inabagan sa City Urban Development and Housing Division (CUDH) ubos sa Mayor’s Office, masugdan na dili madugay ang maong mga proyekto.

Matod pa sa atoang CUDH head nga si Perfecto Ray Bayo, ang kinatibukang Php 25 milyon direkta gikan sa kauluhang ahensya isip “assistance for development to relocation/subdivision.” Gidugang ni Bayo nga ang City Government, pinaagi sa ilang buhatan, nag-facilitate alang sa pagmugna sa home owners’ association sa Flores Village.