Dugang proyekto na usab ang nadugang sa syudad sa Malaybalay kon diin usa ka mahinungdanong groundbreaking ceremony ang napahigayon sa Brgy San Jose niadtong Setyembre 29, 2022 human kini nagahinan og pundo gikan sa kaulohan nagkantidad og Php 55 milyon.

Ang groundbreaking ceremony gipangulohan ni Atty. John Flores, congressman sa segundo distrito. Sa parte sa City Government of Malaybalay, gitambongan kini sa mga opisyales sa pagpanguna ni Mayor Jay Warren R. Pabillaran.

Nibisita usab ang personahe gikan sa Department of Human Settlements and Urban Development (DHSUD) nga si Assistant Secretary Dr. Melissa Aradanas, EnP, ug si Regional Director Ariel Abragan sa DHSUD-10. Nitambong usab sa maong kalihokan si Vice Mayor Estelito Marabe kauban ang mga opisyales sa syudad sa Malaybalay ug brgy San Jose, asosayson sa homeowners, ug uban pa nga lumilihok sa maong proyekto.

Nasayran nga ika-duha na kini nga higayon nga si Cong. Flores ang naglihok para mapundohan ang housing area sa San Jose, ug kini gi-aprobahan ug gigahinan sa DHSUD. Kahinumdoman nga una ang Brgy Linabo nahatagan sa susamang proyekto nga nagkantidad og Php 25 milyon niadtong Hulyo 18, 2022.

Ang lumolupyo sa Brgy. San Jose relocation site makatagamtam na sa gihandum nga proyekto sa pagpasemento sa dalan ug drainage balor og Php 50 milyon. Lakip pagatukoron ang multi-purpose building nga nagkantidad Php 5 milyon.

Dako ang pasalamat ni Mayor Pabillaran nga kini makahatag tabang ug kaayohan sa katawhan pinaagi sa pag-abag sa City Urban Development and Housing Division (CUDHO) nga ang proyekto niya sa maong relocation site adunay dugang assistance. Hangyo sa atong Mayor sa homeowners nga ampingan ang benepisyo gihatag sa atong gobyerno ug pagabayaran ang ginagmay nga binulan.

Gitapos ang maong kalihokan sa usa ka pulong-pulong nga nahisgutan ang susamang proyekto sa umaabot nga panahon nga posibling igahin ug ikalambo pa sa dakbayan.

Report: CMO-CUDHO NADA