Giaprobahan na sa Sangguniang Panlungsod ang Ordinance No. 1005 S 2022 , mao ang pag-institusyunal ug pagtukod sa Public Employment Service Office (PESO) diha sa Barangay Action Center (PBAC) sa matag barangay sa syudad sa Malaybalay.
Kaniadtong Setyembre 14, 2022, ang City Administrator/PESO Manager Atty. Anna Marie R. Bergado nagsulat ngadto kang Vice Mayor Estelito R. Marabe uban sa paghangyo nga mag-mugna sa maong ordinansa pinasubay sa Republic Act 8759 otherwise known as PESO Act of 2009.
Nasayran nga ang pagtukod sa PBAC makapalig-on ug magpalapad sa serbisyo nga mahatag ngadto sa katawhan sa kabarangayan labi na kadtong nangita ug nanginahanglan sa trabaho.
Ang maong ordinansa gisulat ni Vice Mayor Marabe, ug giduso kini ni Konsehal Bonifacio G. Valiente nga hiniusang gi-uyonan usab sa konseho niadtong Oktubre 11, 2022 atol sa ilang ika-14 nga regular session.
Tungod niini, mahatagan ug katumanan ang maong balaudnon ug mas mapadali ang paghatag sa serbisyo ug matubag ang panginahanglan sa katawhan sa syudad sa Malaybalay.
Report: Mary Lou Gaid, SP-NADA
