Napili ang City of Malaybalay isip usa sa tulo ka pilot areas sa national program nga gitawag ug ProtecTEEN: Psychosocial Support and Other Interventions for Adolescent Mothers and their Families. Ang laing areas sa nasud mao ang Antipolo sa Rizal province, ug ang Malabon City sa Metro Manila. Tumong sa maong programa ang pagtabang sa mga teenage mothers ug ilang pamilya sa pagsagubang sa hagit sa sayo nga pagpanganak ug pagka-ginikanan.

Gipahigayon karong adlawa, August 10, 2022 ang Signing of the Memorandum of Agreement (MOA) cum Launching alang sa programang ProtecTEEN kon diin nipirma sa maong MOA sila si DSWD Usec Denise Bernos-Bragas, regional director sa ahensya nga si Mariflor Libang, ug si City Mayor, Jay Warren Pabillaran. Kauban sa amahan sa dakbayan nga nipirma ang Acting CSWDO nga si Ivy Amor Urbina. Gihimo usab ang Signing of Pledge of Commitment sa mga ahensya nga aduna’y kalambigitan sa maong programa.

Nitambong usab sa makasaysayanon nga MOA Signing ug paglunsad sa programa si Konsehal Brian Nelson Flores nga maoy niduso ug nagpasabot sa Sangguniang Panlungsod sa maong programa niadtong July 26, 2022. Si Flores miyembro sa Committee on Health ug Committee on Family, Women and Children, nga niadtong tungura, nihulip kang Konsehala Kathleen Cecille Pagaling nga maoy chairperson sa duha ka komitiba.

Sa pagpanguna ni City Legal Officer Julius Michael Barroso nga niadtong tungura City Administrator – OIC, ug inabagan sa CHO chief Dr. Dennis Sangalang ug ni Ms. Urbina sa CSWDO, daling na-aksyonan ang preparatory activities ug hangtod nga na-aprubahan ang SP Resolution nga nitugot sa atoang City Mayor sa pagpirma sa ProtecTEEN MOA uban sa DSWD.

Unsa ang ProtecTEEN? Usa kini ka programa nga maghatag ug tukmang suporta ug pag-amuma sa mga babayeng nahimong ginikanan sa edad 10 years old hangtud 19 years old (teenage mothers). Sila pagahatagan ug edukasyon kabahin sa ilahang sitwasyon, ingon man sa ilang pamilya ug ang amahan sa ilang anak.

Ang pilot program motutok una sa pipila ka mga teenage mothers ug ilang pamilya diha sa Brgy. San Jose ug sa Brgy. Kalasungay. Gihatagan ug gibug-aton ang privacy ug laing lakang sa pagprotektar sa mga nalistang mosalmot niining programa. Human sa MOA Signing cum Launching, natakda ang pag-validate ug pag-interbyu sa mga na-ilang partisipante sa pilot program gikan sa duha ka barangay.

Sa umaabot usab nga mga bulan, pagahatagan sa training ug seminar ang mga service providers o mga lumilihok sa ground para mahanas ug matarung ang pagdumala sa maong programa, ilabi na nga sensitibo ang mga teenage mothers ug ilang pamilya sa ilang tagsa-tagsa ka kahimtang.

Sa higayon nga matapos sa mga teenage mothers ug ilang pamilya ang sunod-sunod nga pagtulun-an, tabangan usab sila sa pag-sagubang sa mga ekonomikanhong hagit pinaagi sa livelihood.