Agi og pagsaulog sa buwan sa mga kawani karong Setyembre, gipasundayag ang binulan nga programa diri sa dakbayan sa Malaybalay pinaagi sa tema, “Kabag-ohan sa Serbisyo Publiko Maangkon, Umaabot nga Mo-alagad Hulmahon.”

Ang buhatan sa City Administrator kauban ang opisina sa Public Employment and Service Office (PESO) – Malaybalay ug DOLE-GIP ang nagpasiugda sa nasangpit nga kalihokan karong Setyembre 11, 2023 diri sa City Hall, Casisang.

Nahimong dinapit nga mamumulong si Fr. Jonathan C. Tianero, kasamtangang Communications Media Director sa Diocese of Malaybalay, nga pormal nga gipaila ni City Administrator, Atty. Anna Marie R. Bergado.

Gisaysay ni Fr. Tianero sa iyang mensahe kung unsa ka paspas ang pagdagan sa kausaban dili lang sa nasud kon dili sa tibuok kalibutan sulod lang sa duha ka dekada hilabi na ang dali nga paglambo sa teknolohiya.

Taliwala niini, iyang gipasabot atubangan sa mga opisyales ug kawani nga aduna’y hulga sa pagsulpot sa mga bag-ong teknolohiya ug pag-abot sa “artificial intelligence” kon A.I. karong panahona.

Apan iyang hagit sa kadagkoan ug mamumuo nga usa kini ka katungdanan ug responsibilidad nga ma-protekhan ug mahatagan og giya ang atong katawhan sa saktong pag-gamit sa bag-ong teknolohiya.

Dugang pa niya pinaagi sa pagbansaybansay sa mga emplayado ug paghulma sa umaabot nga moalagad, dili kita angay mahadlok ug ibalik nato sa pinaka-ilalom ang tiunay nga pag-alagad sa katawhan inubanan sa pagsangpit sa labawng makagagahum.

Sa mensahe usab ni Mayor Jay Warren R. Pabillaran iyang gipamulong nga moabot ang panahon nga kita na usab ang hukman sa umaabot nga henerasyon pinaagi sa atong mga lihok ug desisyon.

Iyang gipasigarbo nga pinaagi sa maayong pag-gamit sa teknolohiya, makita na ang dayag nga impormasyon ngadto sa katawhan sama sa pagpahigayon sa public bidding ug ingon man ang sesyon diha sa hawanan sa konseho, ug uban pa nga kalihokan sa syudad sa Malaybalay.