Ang LGU Malaybalay pinaagi sa Public Employment Service Office (PESO) nagpahigayon og Special Program for Employment of Students (SPES) ug sa Work Appreciation Program (WAP) Payout niadtong Agosto 24, 2023 didto sa Barangay 6 Covered Court sa Malaybalay City, Mitambong sa maong kalihokan sila si City Mayor Jay Warren R. Pabillaran, City Administrator ug PESO Manager Atty. Anna Marie R. Bergado, ug ang Department of Labor and Employment (DOLE) Provincial Director nga si Mr. Raul L. Valmores.

Ang mga nakabenepisyo sa SPES nakadawat ug 60% sa ilang suweldo alang sa pagtrabaho sa usa ka temporaryong panahon sa 20 ka adlaw. Kini nga salapi, nga mokabat sa P6,827.00 matag usa, giponduhan sa LGU Malaybalay ug ang nahabilin nga 40% paga ihatag sa DOLE sa mga mosunod nga semana. Mikabat sa 169 ka mga estudyante ang nakaangkon ug benepisyo gikan sa maong programa.

Dugang pa niini, ang 145 ka mga benepisyaryo sa WAP nakadawat sa ilang tibuok sweldo alang sa pagtrabaho sulod sa 10 ka adlaw. Ang WAP gigahinan og pundo sa LGU Malaybalay ug mokabot kini ngadto sa Php 618,715.00 Matag usa sa mga benepisyaryo nakadawat og P4,267.00

Si Mayor Warren Pabillaran sa iyang mensahe mapasalamaton sa programa nga sama niini, tungod kay naghatag ug dako nga tabang alang sa pagsuporta sa edukasyon sa mga kabataan. Dugang pa, naglaum siya nga ang mga estudyante magdako nga mgaproduktibong katawhan sa dakbayan. Gigamit usab ni Mayor Pabillaran ang higayon nga makipag diskurso sa mga estudyante, diin gitubag niya ang ilang mga pangutana ug mga isyu kabahin sa dakbayan.

Report: PESO – NADA