Niadtong Septyembre 12, 2023, ang Sunflower Weavers’ Association sa Barangay Manalog ning dakbayan sa Malaybalay nakadawat sa mga materyales alang sa Abaca Weaving Project nga nagkantidad ug Ph 300,000.00 gikan sa Department of Labor and Employment (DOLE) ug sa pakig-koordinasyon sa lokal nga pangagamhanan sa Malaybalay pinaagi sa Public Employment Service Office (PESO).

Ang maong kalihukan gitambongan ni City Administrator ug PESO Manager Atty. Anna Marie R. Bergado, Jomel Capoy – First United Puntian Farmers Association (FIPUFA) President, Jan Niño Pabillaran – City Agriculture Extension Officer, ug mga miyembro sa Sunflower Weavers’ Association.

Ang proyekto gidawat sa mga miyembro sa asosasyon sa pagpanguna sa ilang presidente Ms. Jena Lagunday , diin iyang gipa-abot ang ilang dakong pag pasalamat sa mga ahensya nga nakatabang nga makab-ot nila ang maong proyekto. Mipahimangno usab siya sa mga miyembro nga magpadayon sa paghabi ug pagtahi aron makabuhat ug daghang mga produkto nga ilang mabaligya.

Si Atty. Bergado mipaabot sa mensahe ni City Mayor Jay warren R. Pabillaran nga nagkanayon nga hatagan ug importansya ug buhion ang industriya sa abaca ug mga handicraft products sa syudad. Iya usab gisaysay nga tarongon ang pagdumala sa maong proyekto tungod kay ang DOLE mamahimong mohatag ug dugang pondo alang sa mga proyekto nga maayo ang pagdumala alang sa ilang panginabuhian.

Ang LGU pinaagi sa PESO padayon sa paghimo ug koordinasyon sa mga ahensya nga mosuporta sa paghatag ug panginabuhian ngadto sa mga sektor nga nanginahanglan.

Report: PESO-NADA