Nagpahibalo ang Business Permits and Licensing Office (BPLO) nga kamulo na nilang gipanghatag ang bag-ong gula nga taripa alang sa temporaryong pagsaka sa pletihan sa tanang motorela diri sa syudad sa Malaybalay. Nagsugod ang pagpang-apod-apod karong adlawa, July 13, 2022 hangtod sa July 15, 2022.

Ang maong bag-ong pletihan pinasikad base sa Ordinansa Numero 1001 series of 2022. Kini human nihangyo ang Malaybalay City Federation of United Motorela Operators and Drivers Association (MACFUMODA) nga tugotan sa usa ka motorela fare matrix system o kaha temporaryo nga sak-an ang pletihan tungod sa walay puwas nga pagsaka sa gasolina.

Hinungdan niini, ang Malaybalay City Motorela Franchising and Regulatory Board (MCMTFRB) nagpasiugda og public hearing niadtong Hunyo 27, 2022 para mapasabot sa katawhan ang maong isyu. Pinasubay sa Board Resolution No. 01 Series 2022, nagrekomendar ang maong board sa Sangguniang Panlungsod nga matuman ang provisional increase nga Php 2.00 nga pagtaas sa pletihan.

Gidungog ang mulo sa atong transport sector tungod sa krisis sa lana apan gilantaw pud ang kaayuhan alang sa katawha’ng maapektuhan sa maong fare increase. Ug tuod man, sa hawanan sa konseho ubos sa pag-sponsor ni Hon. Cromwell Kiril D. Dinlayan isip chairperson sa Transportation, Communications and Traffic Management, ilang nahisgutan ang maong hangyo ug epekto niini sa katawhan sa higayon nga mag-take effect ang pagtaas sa pletihan.

Ang bag-ong pletihan sulod lang sa poblacion anaa sa Php 11.00 gikan sa daan nga Php 9.00; ug Php 12.00 gikan sa pletihan Php 10.00 rota Poblacion paingon Landing Area (vice versa).

Apan gibutyag sa BPLO nga adunay diskwento alang sa atong senior citizens, estudyante, ug PWDs nga magpleti lang og Php 9.00 sulod sa Poblacion ug Php 10.00 Poblacion-Landing Area. Samtang gihatagan pud of special fare atong estudyante sa elementarya sa Php 7.00 sa Poblacion ug Php 8.00 ang pletihan sa Poblacion-Landing Area.

Gihangyo ug gipasabot sa MCMTFRB nga temporaryo lang kini ug tinguha nga makabuhat ug usa ka Automatic Fare Matrix System nga paborable sa tanan sektor nga apektado.

With report: SP, BPLO – NADA